«Адно акно» — у разы хутчэй!

Источник материала:

Паводле слоў Аляксандра Георгiевiча, год таму, акурат перад навагоднiмi святамi, паштавiкi Аршаншчыны зрабiлi мясцовым жыхарам «аднаваконны» падарунак. Нехта падлiчыў, што «акно» дазволiла зэканомiць час спажыўцоў мiнiмум разоў у 10! Калi я нядаўна быў у гэтым рэгiёне ў камандзiроўцы, зайшоў на тыповае паштовае аддзяленне. Адразу кiнулася ў вочы сучаснае афармленне, фiрменнае: сувязiсты Вiцебшчыны, дарэчы, стараюцца, каб усе iх «кропкi» нават у невялiкiх вёсках былi аформлены ў адзiным стылi, як гэта робяць i iх замежныя калегi. Чаргi да акенца аператара не было, i гэта сярод дня, у час «пiк». I лiтаральна за хвiлiну перада мной абслужылi чарговага наведвальнiка.

Падчас нашай размовы Аляксандр Кiшкурна ўспомнiў, як было складана выканаць усю падрыхтоўчую работу, каб «акно» запрацавала эфектыўна.

— Трэба было дамовiцца з усiмi пастаўшчыкамi паслуг, якiх больш дзесяцi, устанавiць усё неабходнае абсталяванне, запусцiць у эксплуатацыю спецыяльны праграмны прадукт. Каб бесперабойна функцыянавала наша камп’ютарная сiстэма, вельмi пастаралiся iнжынер-праграмiст Людмiла Бажко i iнжынер-электроншчык Дзмiтрый Сяроў. З боку мясцовай улады нам ва ўсiм дапамагаў «куратар» гэтага працэсу — першы намеснiк старшынi гарвыканкама Мiкалай Кавальчук. У вынiку мы сталi першымi, хто здолеў арганiзаваць прынцып «аднаго акна». Памятаю, былi часовыя праблемы з аплатай паслуг за тэлефон i радыёкропкi, але ж напачатку 2006-га яны адышлi ў гiсторыю. З фiлiялу «Белтэлекама» мы атрымалi адпаведную базу... Цяпер на пошце можна заплацiць лiтаральна за ўсё, чым людзi карыстаюцца дома i не толькi: за газ, святло, хатнi i мабiльны тэлефоны... На адзiны рахунак можна пералiчыць грошы з дапамогай пластыкавых картак. Мы ў гэтым накiрунку добра супрацоўнiчаем з «Белагра-прамбанкам», «Белiнвестбанкам», «Белгазпрамбанкам», на падыходзе — «Пріорбанк».

Падначаленыя Аляксандра Георгiевiча абслугоўваюць больш за 260 населеных пунктаў, i каля паловы з iх — далёкiя. I ў любое надвор’е каля 200 паштальёнаў спяшаюцца як мага хутчэй прынесцi людзям свежыя газеты, пiсьмы i г.д. «I, канешне, у большасцi выпадкаў у сельскiх Саветах нам заўсёды дапамагаюць па самых розных пытаннях. Напрыклад, зiмой дарогу трэба пачысцiць да паштовага аддзялення. «Зробiм!» — адкажа старшыня. Калi ж паштальёну замену трэба знайсцi, мы i прадстаўнiчыя ўлады разам шукаем кандыдатуры».

«Мы аказваем каля 45 вiдаў паслуг: у прыватнасцi, гандлем займаемся, — падкрэслiвае Аляксандр Георгiевiч — Ведаем, што ў многiх вёсках толькi паштальёны зробяць тое, чым не займаюцца работнiкi iншых арганiзацый».