НА ГЛЫБОЧЧЫНЕ ЛЁН УБРАНЫ З ПАЛЁЎ!

Источник материала:

Наш раён адным з першых у вобласці завяршыў уборку льнотрасты з палёў. Вялікі поспех! Выдатная працоўная перамога! Радасць з гэтай нагоды разам з калектывам адкрытага акцыянернага таварыства “Мосарлён”, яго дырэктарам Віктарам Кейзікам і васямнаццацю механізатарамі з шэрагу прадпрыемстваў і арганізацый раёна, якія накіраваны на дапамогу льнаводам, па праву раздзяляе і кіраўніцтва Глыбоцкага раёна на чале са старшынёй раённага выканаўчага камітэта Алегам Віктаравічам Морхатам.

У панядзелак 17 верасня вялася падборка льнотрасты на апошніх 80 гектарах. На полі, што на мяжы Глыбоцкага і Шаркаўшчынскага раёнаў, у гэты дзень работа літаральна кіпела, трактары з прэспадборшчыкамі гудзелі, снавалі, не раўнуючы, як тыя ўдалыя працаўніцы-пчолкі. Сюды, каб павіншаваць з такім выдатным працоўным дасягненнем калектыў ільнозавода ў асобе яго дырэктара і механізатараў, якія пашчыравалі на ўборцы лёну, і прыехалі кіраўнік раёна Алег Морхат, яго першы намеснік, начальнік упраўлення сельскай гаспадаркі і харчавання райвыканкама Іосіф Пачкоўскі. Падчас невялічкага перапынку на ўскрайку поля сабралася ўся сапраўды баявая “гвардыя” – механізатары, занятыя на падборцы льнотрасты. Са словамі шчырай падзякі за ўдарную працу да іх звярнуўся Алег Віктаравіч.

—Спаўна папрацавалі мы ўсе разам у раёне і дасягнулі належных вынікаў, хаця хапала прычын для хваляванняў: і вясной, і ўлетку багата было засушлівых дзён, — сказаў Алег Віктаравіч. — Тым не менш, ураджай атрымалі добры і насення, і льнотрасты. Усё ў тым, што своечасова пасеялі, арганізавалі належны догляд. У выніку атрымалі лён чысты, густы.

Камандны дух, сур’ёзная падтрымка ў арганізацыі работ на льняных палетках раёна даюць добры плён. Сёння завяршаецца вялікая работа. Справіліся ў самыя сціслыя тэрміны, спарадкавалі лён – важную, можна сказаць, стратэгічную сельскагаспадарчую культуру для нашай краіны, для нашага рэгіёну. Лён – наша нацыянальнае багацце. Нездарма яго сінія кветкі ўпрыгожваюць герб Рэспублікі Беларусь.

Алег Віктаравіч даў высокую ацэнку рабоце механізатараў, ільнаводаў раёна, асабіста дырэктара Мосарскага льнозавода Віктара Кейзіка. Высокая арганізацыя і правядзенне якаснай і аператыўнай работы на ўборцы льну была адзначана Падзякай старшыні райвыканкама. І яшчэ быў такі прыемны ўрачысты момант падчас ушанавання ўдзельнікаў уборкі льну. Старшыня райвыканкама горыча павіншаваў і ўручыў каштоўны падарунак маладому механізатару Дзмітрыю Мурзічу, які зусім нядаўна ажаніўся, стварыў сваю сям’ю.

Моцным поціскам рук Алег Віктаравіч падзякаваў за работу кожнаму механізатару.

Першы намеснік старшыні райвыканкама Іосіф Іванавіч Пачкоўскі таксама адзначыў высокі прафесіяналізм удзельнікаў уборкі льну і адрасаваў ім самыя найлепшыя пажаданні міру, дабра і здароўя.  А дырэктар ААТ “Мосарлён” Віктар Пятровіч Кейзік гаварыў пра той працоўны ўклад у агульную справу, які зрабіў кожны з механізатараў, назваў самых старанных.
Аператыўнае і якаснае правядзенне ўсяго комплексу работ на ўборцы льну – вынік пастаянных шчырых клопатаў кіраўніка нашага раёна, дырэктара льнозавода, яго работнікаў, а таксама кіраўнікоў і механізатараў шэрагу арганізацый раёна, якія прыходзяць на дапамогу льнаводам. Дзякуючы такой зладжанай рабоце на працягу апошніх гадоў у нашым раёне на ўборцы льну не выкарыстоўваецца ручная праца.

Па тэмпах работ ААТ “Мосарлён” заўсёды  сярод лепшых на Віцебшчыне, ды і ў рэспубліцы любому дасць фору. І гэта пры тым, што Мосарскі льнозавод самы старэйшы. Вялікая заслуга ў у паспяховай рабоце калектыву  (і мы неаднойчы ўжо адзначалі на старонках газеты) Віктара Пятровіча Кейзіка, умелага гаспадарніка, арганізатара вытворчасці, вопытнейшага кіраўніка, лаўрэата ганаровага звання “Чалавек года Віцебшчыны-2015”. Пры падтрымцы раённага кіраўніцтва прадпрыемства на працягу шэрагу гадоў працуе стабільна паспяхова. Вось і сёлета хутка і аператыўна быў убраны лён на плошчы ў 850 гектараў. Перамога, здабытая ў напружанай працы.