Гісторыя ўзаемаадносін у музейных экспанатах. 21.by

Гісторыя ўзаемаадносін у музейных экспанатах

Размер текста:
A
A
A

Сімвалічная дата – 2 красавіка – даўно стала для кожнага беларуса і расіяніна знакам добрай волі, згуртаванасці, міру і росквіту. Гэты дзень сімвалізуе непарушную дружбу беларускага і расійскага народаў, іх сапраўднае братэрства.

У Валожынскім краязнаўчым музеі захоўваецца значная калекцыя рарытэтных экспанатаў, якія ў розныя гады ў якасці падарункаў перадаваліся ў дар раёну дэлегацыямі гасцей ці прадстаўнікамі Валожына пасля сяброўскіх візітаў у гарады-пабрацімы.

Чатырнаццаць гадоў таму ў Зарайску – цэнтры аднаго з муніцыпальных раёнаў Маскоўскай вобласці – быў заключаны дагавор аб супрацоўніцтве між Валожынам, двума расійскімі гарадамі – Зарайскам і Арзамасам, украінскім Макаравам і балгарскім Попава. З той пары дружнае кола пашырылася. Зараз у ім значацца яшчэ некалькі населеных пунктаў Польшчы, Літвы, Эстоніі…

Традыцыйна найбольш цесныя сяброўскія стасункі падтрымліваюцца з гарадамі Расійскай Федэрацыі. У 2014 годзе сімвалічны мост дружбы працягнуўся між Валожынам і Лобняй. Перыядычна прадстаўнікі гарадоў, што паспелі стаць братамі не толькі на паперы, накіроўваюцца адзін да аднаго з мэтай удзелу ў самых маштабных і знакавых мерапрыемствах. А хто ж едзе ў госці з пустымі рукамі?

Пра многія экспанаты, з якіх ў музеі літаральна “здзьмухваюць пыл”, дырэктар установы Наталля Лоўчая можа расказваць гадзінамі. За кожным з іх – гісторыя.

Вось сувеніры з Арзамаса, які часта называюць горадам храмаў. Сярод падарункаў мноства інфармацыі аб культавых будынках, выявы ўнікальных ікон з падрабязным апісаннем. Арзамасцы ганарацца сваім машынабудаўнічым заводам. Аматарам ваеннай тэхнікі будуць цікавымі мадэлі баявых машын. Кожная заключана ў шкляны прамавугольнік – прыгожа і салідна. Шырока прадстаўлены таксама падарачныя планшэты з фотаздымкамі гістарычных месц, друкаваная прадукцыя.

Са старажытнага Зарайска – горада на рацэ Асётр – звычайна прыбываюць наборы паштовак, у якіх крок за крокам прасочваецца амаль тысячагадовае жыццё горада. Ёсць некалькі карцін, на якіх – гонар кожнага зарайца – старажытны крэмль, цэрквы, мясціны, звязаныя з вядомымі асобамі. Славіцца горад і незвычайнай колькасцю помнікаў. Пра іх можна даведацца з шыкоўных падарачных фаліянтаў.

З Лобні падарункаў значна менш. Не дзіва – не паспелі назапасіцца за невялікі тэрмін. Тым не менш, ёсць на што паглядзець. Усяго ў 4-х кіламетрах ад горада размешчаны сусветнавядомы аэрапорт “Шарамецьева”. Таму многія сувеніры на “паветраную” тэматыку. Лобня размяслілася на месцы старажытнага паселішча, а гэта значыць, што паданні і легенды цудоўна ўпісаліся ў сучаснасць, пра што сведчаць маляўнічыя брашуры, вымпелы і плакаты.

Кожны з гэтай тройкі гарадоў славіцца развіццём рамёстваў, таму можна пабачыць вырабы, выкананыя ў розных тэхніках. Тут ёсць гербы, лялькі чаканкі на метале, значкі… Тым, хто выкажа жаданне, супрацоўнікі музея могуць наладзіць прагляд відэа – маецца цэлая калекцыя дыскаў. Прыцягваюць погляд фота дэлегацый. Цікава пагартаць і памятныя адрасы, за словамі якіх гісторыя не толькі Арзамаса, Зарайска ці Лобні, але і нашага Валожына.

Дарэчы,  у 1957 годзе створана Сусветная федэрацыя пародненых гарадоў. Рашэннем гэтай арганізацы, прынятым у Парыжы ў 1963 годзе, апошняя нядзеля красавіка аб’яўлена Сусветным днём пародненых гарадоў.

Валянціна КРАЎНЕВІЧ,

фота аўтара

 
 
Чтобы разместить новость на сайте или в блоге скопируйте код:
На вашем ресурсе это будет выглядеть так
Сімвалічная дата – 2 красавіка – даўно стала для кожнага беларуса і расіяніна знакам добрай волі, згуртаванасці, міру і росквіту. Гэты дзень сімвалізуе непарушную...
 
 
 


Архив (Новости Культуры)

21.by в социальных сетях


© 2004-2018 21.by
Яндекс.Метрика