У Смаленск – на “Спасаўкі”

– Мы прадстаўлялі на свяце Віцебскую вобласць, – расказала дырэктар Шумілінскага раённага цэнтра культуры Марына Прохарава. – Наш народны фальклорны гурт “Гульбічы” (кіраўнік Ларыса Цыркунова, музычны кіраўнік Анатоль Міхееў) падрыхтаваў для жыхароў і гасцей Смаленска цікавую канцэртную праграму. І варта сказаць, што яна знайшла жывы водгук у гледачоў, якія ахвотна падпявалі і крычалі “брава!”

Разам з “Гульбічамі” на “Спасаўкі” паехалі і майстры Шумі-лінскага Дома рамёстваў – адметныя майстар-класы паказалі Кацярына Барабанава (па маляванцы) і Яўгенія Шарыпава (па шматковай тэхніцы).

Пасля выступленняў шумілінцы прагуляліся па імправізаваных вуліцах “Спасаўкі”, падзівіліся на смаленскія падворкі з мёдам, пернікамі і яблыкамі, на выставу-кірмаш тутэйшых майстроў дэкаратыўна-прыкладной творчасці, на дэфіле дзяўчат у этнічных уборах, на тыя адметнасці, якім вызначалася свята расійскіх суседзяў.

Запомнілася смаленскае свята і новымі знаёмствамі. Многія падыходзілі, запісвалі кантакты, пыталіся, ці можна запрасіць шумілінскіх артыстаў на юбілей, іншае мерапрыемства, дзякавалі за творчасць.

А за ўдзел у “Спасаўках” шумілінцы атрымалі ўдзячны ліст ад Смаленскага абласнога цэнтра народнай творчасці.

Аліна ПЯТРОВА.

Надрукавана ў №69 ад 03.09.2019 г.