Сустрэча з пісьменніцай Таццянай Дземідовіч на тыдні дзіцячай кнігі ў СШ №29 г. Брэста - фото

Источник материала:

19 сакавіка ў сярэдняй школе №29 горада Брэста стартаваў тыдзень дзіцячай кнігі. На адкрыццё тыдня была запрошана старшыня абласнога аддзялення грамадскага аб’яднання “Саюз пісьменнікаў Беларусі” Таццяна Дземідовіч – дзіцячая пісьменніца.

У пачатку мерапрыемства загадчыца школьнай бібліятэкі Таццяна Мікалаеўна Драчук пазнаёміла дзяцей з гісторыяй узнікнення тыдня дзіцячай кнігі.

А затым узяла слова Таццяна Дземідовіч, якая расказала вучням пра пісьменніцкую арганізацыю Берасцейшчыны, якую яна ўзначальвае, пра складанасці напісання твораў для дзяцей, пра свае планы і мары.

Вучням цікава было пачуць адказы на такія пытанні: адкуль бярэ пісьменніца тэмы і вобразы для сваіх твораў, як сям’я ўспрымае яе творчую дзейнасць, якія праблемы чалавечых адносін патрэбна вырашаць неадкладна, які лёс чакае кнігу і іншыя.

Сустрэча прайшла цёпла. Вучні слухалі выступленне чалавека, які ўдумліва крочыць па зямлі, заўважаючы ўсе змены, якія адбываюцца вакол, сваімі творамі напаўняе дабрынёй сэрцы дзяцей і вучыць любіць сваю маленькую радзіму.

Н.М.Палякова, настаўніца беларускай мовы і літаратуры