Дзеля жыцця без бар’ераў

Источник материала:

Алёна НІКАНЧУК. Фота Крысціны СЕМЯНЮК.

На мінулым тыдні на базе нашага раёна адбылося выязное пасяджэнне Рэспубліканскага Савета ГА “БелТІЗ” па комплекснай рэабілітацыі інвалідаў па зроку. Яго ўдзельнікі пабывалі ў Жабінкаўскай спецыяльнай агульнаадукацыйнай школе-інтэрнаце і раённай бальніцы.

У школе-інтэрнаце госці наведалі спачатку вучэбны корпус установы. Пабывалі ў кабінетах замежнай мовы, інфарматыкі, фізікі, пачатковых класаў, дзе ўбачылі, як арганізаваны навучальны працэс для выхаванцаў, як абсталяваны працоўныя месцы для невідушчых і слабавідушчых дзяцей, якімі падручнікамі яны карыстаюцца. Заўважылі, што кабінеты аснашчаны аптычнымі лупамі і электроннымі павелічальнымі ўстройствамі, у адукацыйным працэсе выкарыстоўваюцца сучасныя тыфлатэхнічныя і карэкцыйныя сродкі. Затым навучэнцы прадэманстравалі, як з дапамогай белага і электроннага кіёў яны арыентуюцца ў памяшканні і на вуліцы. Далей госці перамясціліся ў спальны корпус, дзе спачатку завіталі ў медыцынскі блок. Медработнікі школы-інтэрната расказалі, якое медыкаментознае і фізіятэрапеўтычнае лячэнне атрымліваюць выхаванцы, як праходзяць заняткі на спецыяльнай апаратуры: амбліястымулятары “Аист”, амбліятрэнажоры, сінаптафоры, іншай; на камп’ютары па карэкцыйных праграмах.
Наведалі госці і бібліятэку, якая налічвае 1660 кніг мастацкай літаратуры і больш за 3,5 тысячы падручнікаў, надрукаваных шрыфтам Брайля. Пазнаёміліся таксама з умовамі пражывання выхаванцаў. Затым у актавай зале прайшло пасяджэнне Савета. Яго адкрыла старшыня праўлення Брэсцкай абласной арганізацыі ГА “БелТІЗ” Ірына Юрэня і перадала слова дырэктару школы-інтэрната Аляксандру Кавальчуку. Аляксандр Андрэевіч спыніўся на карэкцыйна-рэабілітацыйнай рабоце, якая ажыццяўляецца на ўроках і карэкцыйных занятках, а таксама падчас выхаваўчых мерапрыемстваў. Ён падкрэсліў, што часткова відушчыя і слабавідушчыя навучэнцы ўстановы сістэматычна ўдзельнічаюць у раённым і абласным этапах рэспубліканскай алімпіяды па вучэбных прадметах, у фестывалі дзіцячых тэатральных калектываў на замежнай мове як на раённым узроўні, так і абласным. Агучыў таксама лічбы, звязаныя з далейшым паступленнем выпускнікоў школы-інтэрната ў сярэднеспецыяльныя і вышэйшыя навучальныя ўстановы, іх працаўладкаваннем.
Гаварыў Аляксандр Кавальчук пра цеснае супрацоўніцтва школы-інтэрната з іншымі ўстановамі, арганізацыямі, прадпрыемствамі і грамадскімі аб’яднаннямі раёна і вобласці, а таксама італьянскім дабрачынным фондам “Дапаможам ім жыць”. Падрабязна расказаў пра медыцынскае абслугоўванне навучэнцаў, якое ажыццяўляецца штатнымі медработнікамі, пра абнаўленне і ўмацаванне матэрыяльна-тэхнічнай базы ўстановы. Гэтыя мерапрыемствы накіраваны на стварэнне безбар’ернага асяроддзя для дзяцей з парушэннямі зроку.
Госці падзяліліся сваімі меркаваннямі наконт арганізацыі адукацыйнага і карэкцыйнага працэсаў у школе-інтэрнаце, далі свае парады і рэкамендацыі. Словы ўдзячнасці за цёплы прыём і экскурсію па ўстанове выказаў яе адміністрацыі і педагогам старшыня Рэспубліканскага Савета, намеснік старшыні Цэнтральнага праўлення ГА “БелТІЗ” Міхаіл Антоненка.
Старшыня праўлення Віцебскай абласной арганізацыі ГА “БелТІЗ” Канстанцін Ламчаноўскі перадаў Жабінкаўскай школе-інтэрнату кнігі і вучэбныя дапаможнікі для слабавідушчых і невідушчых дзяцей, надрукаваныя рэльефна-кропкавым шрыфтам Брайля.
Затым госці наведалі раённую бальніцу. Галоўны ўрач Анатоль Лаўрукевіч правёў экскурсію па ўстанове і расказаў пра тыя мерапрыемствы, якія праводзяцца на яе тэрыторыі па стварэнні безбар’ернага асяроддзя для інвалідаў па зроку. Так, уваходныя дзверы ў паліклініку абсталяваны гукавой і светлавой сігналізацыямі, побач знаходзіцца кнопка выкліку работнікаў рэгістратуры. Інфармацыя пра размяшчэнне кабінетаў прыёму пэўных спецыялістаў надрукавана шрыфтам Брайля і знаходзіцца на стэндзе побач з рэгістратурай. Нумары кабінетаў у паліклініцы і спецыялізацыя ўрачоў прадубляваны на дзвярах брайлеўскім шрыфтам. Усе лесвічныя маршы выдзелены тактыльнымі дыванкамі, дзверы і іх ручкі прамаркіраваны. Анатоль Іванавіч падкрэсліў, што стварэнне безбар’ернага асяроддзя для інвалідаў па зроку ў медыцынскіх установах раёна прадоўжыцца і ў далейшым.
Перад гасцямі выступіла ўрач-афтальмолаг раённай бальніцы Алена Семянюк. Алена Мікалаеўна пачала з лічбаў. Так, на дыспансерным уліку ў афтальмолага знаходзіцца 508 дарослых і 103 дзіцяці, 99 чалавек – інваліды па зроку. Урач назвала асноўныя захворванні гэтых пацыентаў: глаўкома, дыябетычная рэтынапатыя, міяпія, захворванні сятчаткі і іншыя. Расказала пра агляды, абследаванне, медыкаментознае і аператыўнае лячэнне такіх хворых, магчымасць для іх аздаравіцца ў санаторыях. Пазнаёміла з тым абсталяваннем, якое прымяняецца на прыёмах, пры прафілактычных аглядах, карэкцыі і лячэнні зроку.
Госці выказалі словы ўдзячнасці Анатолю Іванавічу за цікавую экскурсію па ўстанове і тую работу, якая вядзецца па стварэнні безбар’ернага асяроддзя для людзей з абмежаванымі магчымасцямі, Алене Мікалаеўне – што знайшла час расказаць аб абследаванні і лячэнні дыспансерных хворых.
Вынікі выязнога пасяджэння Рэспубліканскага Савета ГА “БелТІЗ” былі падведзены ў актавай зале райбальніцы, акрэслены далейшыя задачы і запланавана чарговая сустрэча, якая пройдзе ў сталіцы.