Ганцавічы адзначылі Дзень Дзяржаўнага герба і Дзяржаўнага сцяга Рэспублікі Беларусь

Гэтую ўрачыстую дату ў краіне святкуюць у другую нядзелю мая. Але мерапрыемствы, прысвечаныя падзеі, пачаліся ў Ганцавічах ужо ў пятніцу.
У гарадскім Доме культуры ладзіўся святочны канцэрт з нагоды дзяржаўнага свята. Творчыя калектывы і выканаўцы падрыхтавалі для гасцей урачыстасці тэматычную праграму. На мерапрыемстве прысутнічалі кіраўніцтва раёна, прадстаўнікі арганізацый і ўстаноў горада, навучэнцы школ і гімназіі.

Пра герб і сцяг Беларусі, пра беражліывыя адносіны да іх, пра любоў да малой радзімы і патрыятызм ішла гаворка падчас «круглага стала», які ладзіўся ў малой зале райвыканкама ў нядзелю і быў прысвечаны дню нараджэння галоўных сімвалаў нашай краіны. На пасяджэнне былі запрошаны кіраўнікі структурных падраздзяленняў райвыканкама, настаўнікі гісторыі гарадскіх і сельскіх школ, адзінаццацікласнікі гімназіі горада Ганцавічы. Падрабязнасці сустрэчы — у нумары «СП» за сераду.