Туі – на месцы смутку і болю

Источник материала:

Вёска Драмлёва знікла з твару зямлі жудасным ранкам 11 верасня 1942 года. Нявінна забітыя драмлёўцы маглі б жыць, радавацца сонцу, нараджэнню дзетак… Аднак 183 жыхары гэтай гаротнай вёскі, якая так і не адрадзілася, ператварыліся ў попел падчас карнай аперацыі “Трохкутнік”.
Паўстагоддзя таму на месцы аднаго з хлявоў, у якім зажыва згарэлі бязвінныя вяскоўцы, быў насыпаны курган. Крыху пазней, у 1982 годзе, на гэтым месцы быў устаноўлены мемарыял. Бронзавыя постаці трох жанчын, як сімвал трох пакаленняў, журботна глядзяць у вочы нашчадкам.
Да месца трагедыі на працягу года ідуць і едуць людзі: аддаць даніну памяці заўчасна пайшоўшым з жыцця жыхарам “вогненнай вёскі”, ускласці кветкі і хвілінай маўчання ўшанаваць тых, чые сэрцы раптоўна перасталі біцца вераснёўскім ранкам 1942-га.
Гэтае месца болю і смутку падтрымліваецца ў належным парадку: своечасова скошваецца трава, ачышчаецца ад пустазелля тратуарная плітка. А на мінулым тыдні супрацоўнікі Жабінкаўскай ЖКГ высадзілі паабапал дарожак амаль 90 туй. Калі яны прымуцца, у гэтым самотным месцы стане крыху больш утульна.
Тэкст і фота Святланы БЯЛЯК.