“…А мы не падвядзём”

Источник материала:

МЕНАВІТА жніво вянчае нялёгкую працу хлебаробаў, падводзіць вынікі іх старання. Тэхніку да яго, як заўсёды, хлопцы рыхтуюць грунтоўна. Усе дакладна разумеюць, што прастояў на хлебным палетку ў гарачую пару не павінна быць. У гэтыя апошнія перад выхадам на хлебную ніву дні амаль ля кожнага камбайна можна бачыць заклапочаных механізатараў. Яны штосьці рэгулююць, змазваюць, выпрабоўваюць пракручваннем. Вось і на машынна-трактарным двары ў Занарачы ля двух камбайнаў завіхаліся людзі. Галоўны інжынер таварыства Уладзімір Варанец расказаў, што ўборачная плошча сёлета складае больш за 2300 гектараў.
— Маем адзінаццаць камбайнаў: тры «Дон-1500», адзін «КЗС-10», астатнія — «КЗС-12». Сёлета набылі новы «КЗС-12», які замацавалі за маладым, але вельмі старанным і адказным механізатарам Іванам Сурвілам. Маладым па ўзросце, але не па вопыце. Калі палічыць, колькі гадоў Іван працуе поплеч з бацькам Іванам Зянонавічам, то атрымаецца салідны стаж, —
расказвае Уладзімір Міхайлавіч. — Дарэчы, Іван абкатаў новую тэхніку ў рабоце. Дапамагаў хлебаробам са Сватак убіраць свірэпіцу, а потым і на палетках нашай гаспадаркі абмалочваў насеннікі шматгадовых траў.

— Як падрыхтавана тэхніка да жніва? — пытаюся.
— У цэлым, лічу, някепска. Давялося шмат паваждацца з камбайнам «КЗС-12», які ў мінулым годзе прыгналі з ААТ «Будслаўскае». Перабралі літаральна ўсё, як кажуць, да апошняга вінціка. Хлопцы стараліся, — чую ў адказ.
— Камбайнеры ў вас вопытныя, не першы год убіраюць збажыну, — працягваю размову.
— Не зусім. На камбайне, які прыгналі з Будслава, будзе працаваць малады механізатар Яўген Харашэй. Ён нядаўна прыйшоў да нас у гаспадарку і сёлета ўпершыню будзе ўбіраць хлеб. Яго сябра Цімафей Пашкевіч таксама навічок у таварыстве і першы год на камбайне. Ён даводзіць да ладу «Дон-1500», — кажа інжынер. — Спадзяюся, што дэбют у гэтых хлопцаў стане ўдалым. Астатнія камбайны знаходзяцца на машынным двары ў Старлыгах. Там рамонтнымі работамі кіруе інжынер Ягор Іватовіч.
Едзем у Старлыгі. Тут таксама ля камбайнаў працуюць людзі.
— Хто першым падрыхтаваў тэхніку да выхаду на хлебную ніву? — пытаюся ў Ягора Баляслававіча.
— Наш перадавік Яраслаў Вяршыла. Механізатар малады, але вельмі талковы. А вунь ён, дарэчы, ідзе, — чую ў адказ.
— Які настрой на жніво? — цікаўлюся ў Яраслава.
— Хоць сёння ў поле, — усміхаецца ён. — Фактычна праз дзень-другі распачнём убіраць рапс, які займае плошчу звыш 230 гектараў. А там і збожжавыя падыдуць. Жніво для мяне стала справай прывычнай, хаця кожны раз перад пачаткам хвалююся, быццам першы раз сеў за руль камбайна.
З далейшай размовы даведаўся, што ў 2015 годзе Яраслаў упершыню самастойна ўбіраў хлеб. Тады камбайнам «КЗС-10К» намалаціў амаль 800 тон збожжа і выйшаў пераможцам спаборніцтва сярод камбайнераў-дэбютантаў. Някепска склалася і мінулагодняе жніво. У гаспадарцы ён заняў першае месца, і сярод маладых камбайнераў раёна — таксама. У складзе дэлегацыі ад раёна ездзіў на абласны фестываль-кірмаш «Дажынкі-2017» у Смалявічы.
— Што можаш сказаць пра калег? — пытаюся.
— Не пазычаць вопыту Івану Байко. Ён таксама падрыхтаваў тэхніку да жніва. Сёння заканчвае ўшчыльняць камбайн Уладзіслаў Гуско. Па-баявому настроены на жніво камбайнеры Дзмітрый Свірыд, Аляксей Селюкоў і іншыя механізатары. Галоўнае, каб надвор’е спрыяла, а мы не падвядзём, — адказаў Яраслаў.

Ігнат ЛУБНЕЎСКІ.
Фота Аляксандра Высоцкага.