Главная
Гороскопы
За шматгадовую старанную працу ў Царкве Хрыстовай і ў сувязі са знамянальнай датай з Дня нараджэння прыхаджанка храма Узнясення Гасподня г. Нясвіжа Алена Іосіфаўна Быль нядаўна была ўзнагароджана Архіерэйскай Граматай, падпісанай Прэасвяшчэнным Антоніем, епіскапам Слуцкім і Салігорскім, якую ўручыў благачынны Нясвіжскай царкоўнай акругі, настаяцель храма Узнясення Гасподня протаіерэй Аляксандр Данчанка.
Алена Іосіфаўна — настаўніца, мае медаль “Ветэран працы”, падзякі і граматы за вучэбна-выхаваўчы працэс. Духоўная ўзнагарода для яе — першая.
Яшчэ ў маладыя гады А.І. Быль, не зважаючы на знешнія перашкоды, абумоўленыя рэаліямі тагачаснага жыцця, знаходзіла магчымасць наведваць храм. Се-дзячы на настаўніцкіх канферэнцыях, яна калі-нікалі чула, што кагосьці з настаўнікаў звольнілі за тое, што той асмеліўся хадзіць у храм ці, таго больш, павянчацца, ахрысціць дзіця. Але жаданне прычасціцца Святых Хрыстовых Тайн перамагала боязь пазбавіцца працы, і яна паехала ў царкву ў Баранавічы, яшчэ раз даказаўшы даўно вядомую ісціну: калі чалавек вельмі жадае чагосьці, то шукае магчымасці для здзяйснення задуманага, а не спасылаецца на няпросты час ці складаныя абставіны.
Пачынаючы ад першых крокаў станаўлення новай царкоўнай абшчыны ў Нясвіжы, Алена Іосіфаўна актыўна працавала на ніве духоўнай і працягвае працаваць зараз. На пытанне, як аднеслася яна да ўзнагароды, адказала:
— Я была вельмі задаволена, што ўспомнілі нашу працу: Еўдакіі Шышканавай, Таццяны Гаціла, Галіны Легастаевай, Алены Грыдневай.
Алена Іосіфаўна лічыць гэту ўзнагароду не толькі сваёй, яна ўспрымае яе як вынік агульнай працы несвіжанак, якія рабілі разам з ёю першыя, самыя складаныя крокі да новага храма ў Нясвіжы.
Наведвальнікі духоўна-асветніцкага цэнтра “Існасць”, што працуе пры Нясвіжскай цэнтральнай раённай бібліятэцы імя Паўлюка Пранузы, далучаюцца да віншаванняў настаяцеля і прыхаджан храма Узнясення гасподня г. Нясвіжа са спадзяваннем, што Алена Іосіфаўна яшчэ доўга будзе несці сваё служэнне Богу, храму і лю-дзям, паказваючы добры прыклад для ўсіх, хто яе ведае.
Валянціна ШЧАРБАКОВА,
Фота Святланы ПОЛЬСКАЙ,
г. Нясвіж.