Экспедыцыя, якая вандруе ўжо чвэрць веку. 21.by

Экспедыцыя, якая вандруе ўжо чвэрць веку

20.09.2018 — Разное |  
Размер текста:
A
A
A

Источник материала:

Экспедыцыя,  якая вандруе  ўжо чвэрць веку
Дзень беларускага пісьменства – хвалюючае, узнёслае свята роднай мовы, асветы, духоўнасці. А папярэднічае гэтай важнай культурнай падзеі Міжнародная навукова-асветніцкая экспедыцыя «Дарога да Святыняў» з Благадатным Агнём ад Гроба Гасподняга, якая ўжо 25 гадоў вандруе па прасторах роднай Беларусі, паказваючы, што і праз стагоддзі наш народ з’яўляецца нашчадкам духоўных традыцый святых раўнаапостальных славянскіх асветнікаў Кірылы і Мяфодзія.

 

«Мы до вас з душою,
сонцэм і росою»


Такімі шчырымі, мілагучнымі паляшуцкімі словамі сустракалі жыхары Іванава ўсіх, хто завітаў сюды на свята Кнігі. Па сваёй сутнасці кніга была і па сённяшні дзень застаецца ўніверсальнай крыніцай інфармацыі. Таму сёлета ва ўрачыстай абстаноўцы ўшаноўвалі самых таленавітых сучасных празаікаў і паэтаў Іванаўшчыны. Яны былі адзначаны Нацыянальнай літаратурнай прэміяй. На гэтым цудоўным свяце кніга прадстаўлялася ўсімі існуючымі жанрамі. Тут можна было набыць мастацкую літаратуру для любога ўзросту і па свайму густу. Кнігі Максіма Гарэцкага, вершы Яўгеніі Янішчыц, паэзія Кітая… Для маленькіх чытачоў – серыя «Жывая класіка дзецям»; для тых, каму цікавы творы маладых аўтараў, – серыя «Час ХХI»…
У дзень свята быў адкрыты памятны знак «Янава слова» – сонечны гадзіннік з замацаваным у мармуравай чашы пяром, сімвалам пісьменства, і пазначаны ўсімі назвамі гарадоў, якія калісьці прымалі галоўнае літаратурнае свята краіны. З’явіўся ў Іванава і яшчэ адзін знакавы аб’ект – кнігарня «Верасень». Раней у горадзе не было спецыялізаванай кніжнай крамы, таму жыхары ездзілі ў Пінск, каб набыць патрэбную літаратуру. Неабходна адзначыць, што Іванаўшчына багата і на ўласныя таленты. «Тут адмысловы майстар – што ні хата. Тут што ні чалавек – мастак, паэт, – сцвярджае паэтэса Ірына Салома. – Яны сваім натхнёным сэрцам услаўляюць свой любы самабытны край». Таму больш за паўстагоддзя існуе літаратурнае аб’яднанне «Ясельда», а мясцовыя аўтары штогод прымаюць актыўны ўдзел у паэтычных чытаннях «Янаўскія замалёўкі». Два дні доўжылася свята і набрала такі размах, што выйшла за рамкі горада. Так, у Варацэвічах, на малой радзіме мастака і кампазітара Напалеона Орды, што ў 15 км ад Іванава, адбыўся міжнародны «круглы стол» «Мастацкая літаратура як шлях адзін да аднаго» з удзелам беларускіх і замежных літаратараў. А вось просты чалавек мог пагутарыць з аўтарамі, атрымаць аўтограф на памяць, набыць цікавую кніжку твораў на фестывалі кнігі і прэсы, які адбыўся на цэнтральнай плошчы.

Экспедыцыя,  якая вандруе  ўжо чвэрць веку

 


Так, яе Вялікасць Кніга была ў цэнтры гэтых святочных дзён. Аднак трэба заўважыць, што Дзень беларускага пісьменства адной літаратурай не абмежаваўся. Уразіла гасцей і жыхароў горада мастацка-тэатралізаваная дзея «Малой радзіме пакланюся!». А ўвечары можна было атрымаць асалоду ад творчасці майстроў мастацтваў, паслухаць класічную музыку ці патанцаваць на этнадыскатэцы. Прапанавалася і падарожжа па славутых мясцінах раёна. Вось, здавалася б, якое дачыненне мае да беларускіх мясцін знакаміты рускі пісьменнік Фёдар Дастаеўскі? Аднак менавіта з іванаўскай вёскі Дастоева паходзіць яго род. А Мотыль! Славуты цэнтр вырабу ручнікоў, кажухоў і папулярнай ярмаркі «Мотыльскія прысмакі». Ці ўзяць Стрэльна. Тут знаходзіцца адзіны ў нашай краіне музей народнай медыцыны «Бабуліны вышкі» з унікальнымі рэцэптамі. А сам горад Іванава! Сёлета яму – 595 гадоў. Гэта вельмі прыгожы і дагледжаны цэнтр Заходняга Палесся. Да Дня пісьменства ён яшчэ больш папрыгажэў, абнавіўся, заззяў новымі фарбамі. Яго парк плошчай больш за 26 га, скверы, вуліцы сталі вельмі ўтульнымі. Вось у такі чароўны край, дзе жывуць працавітыя, хлебасольныя і вельмі таленавітыя людзі, дзе кожны святар – інжынер чалавечай душы, і завітала наша Міжнародная навукова-асветніцкая экспедыцыя, у традыцыі якой перанясенне Благадатнага Агню ад Гроба Гасподняга як сімвала асветы і ведаў паводле слоў Збавіцеля: «Я ёсць шлях, і праўда, і жыццё».

 

25 год– дата юбілейная


На працягу ўсяго гэтага часу ўдзельнікі экспедыцыі нясуць Святы Агонь людзям. Нясуць, бо святло Хрыстова прасвятляе, акрыляе і мацуе дух, дапамагае людзям далучыцца да духоўнай і культурнай спадчыны народа. А нязгасны Благадатны Агонь чвэрць века асвячае духоўную і культурную місію пілігрымаў, якія прайшлі і праехалі практычна ўсю Беларусь. Аднак, нягледзячы на час, усё засталося ў памяці – і тая першая экспедыцыя ў Хойнікі. І тое першае пасаджанае дрэўца – яблынька ў Купяцічах. І слёзы людзей, і іх словы падзякі – хоць і было не па дарозе, але ўсё ж такі завіталі… У гэтым годзе маршрут пралёг праз Мінскую і Брэсцкую вобласці і склаў каля тысячы кіламетраў. Місіянеры сустрэліся з прыхаджанамі Мінскай, Барысаўскай і Мар’інагорскай (Лагойск, Малыя Ляды, Свіслач, Рудзенск), Маладзечанскай (Дзяржынск), Слуцкай (Клецк), Пінскай і Лунінецкай (Святое Поле, Целяханы, Лагішын, Іванава), Брэсцкай (Ружаны) епархій.

Экспедыцыя,  якая вандруе  ўжо чвэрць веку

 


Вялікую і вельмі значную ролю ў гісторыі экспедыцыйнага руху адыграла заслужаны работнік культуры Беларусі, лаўрэат прэміі Прэзідэнта «За духоўнае адраджэнне» Ніна Загорская. Зараз гэтую справу працягвае яе сын Аляксандр Лапата-Загорскі. Ён кіраўнік экспедыцыі, навуковы супрацоўнік Нацыянальнай акадэміі навук Беларусі, галоўны захавальнік цудатворнай Загор’е-Сталавіцкай іконы Пакрова Прасвятой Багародзіцы. Аляксандр Мікалаевіч добра памятае, што за 25 гадоў праехалі больш за 31 054 км, хрэсным ходам прайшлі амаль 643 км. Да ўдзельнікаў экспедыцыі далучыліся звыш 3 мільёнаў вернікаў. Падчас набажэнстваў Благадатным Агнём асвечаны 643 храмы, капліцы, манастыры. Місіянеры выступілі перад грамадскасцю ў 2 567 аўдыторыях. У Сад Малітвы было высаджана больш за 2 606 дрэў розных парод. Удзельнікі экспедыцыі пры наведванні сацыяльных прытулкаў, бальніц, дзіцячых дамоў, школ-інтэрнатаў, дамоў ветэранаў вайны і працы, іншых сацыяльных устаноў ахвяравалі 97 350 свечак, запаленых ад Благадатнага Агню. Праз гэты рытуал, які сімвалізуе ўваскрэсенне Збавіцеля ў абліччы агню, кожны вернік можа дакрануцца да святыні і атрымаць ад яе Божую ласку.

 

У жыццёвую скарбонку


Свята пісьменства завяршылася. Удзельнікі экспедыцыі раз’ехаліся з надзеяй у наступным годзе зноў сустрэцца. Кожны з нас папоўніў сваю жыццёвую скарбонку.
Целяханы… Я адчула, што трапіла ў рай. Чаму? Тут жывуць вельмі гасцінныя і сардэчныя людзі. Яны ў адзін голас казалі, што гэта заслуга настаяцеля храма Святой Троіцы айца Васілія. Ён умацоўвае іх дух малітвай, добрым словам, уважлівасцю. А прыхаджане плацяць святару той жа манетай. Вось так і атрымліваецца жыццёвая ідылія на зямлі.
Лагішын… Хрэсны ход. Іх тут два. І ідуць яны насустрач адзін аднаму. Яшчэ імгненне – і гэта ўжо цэлае бязбрэжнае людское мора. А ў нябесны прастор ляціць калакольны звон. І здаецца, у адным храме ён пачынаецца, а другі, падхапіўшы, працягвае яго. А потым усё зліваецца ў адзін чароўны малітоўны звон. Гэта так. Храм Спаса-Прэабражэнскі і касцёл святых Паўла і Пятра стаяць зусім блізка адзін да аднаго.
Іванава… Вернікаў у храме Пакрова Прасвятой Багародзіцы – яблыку недзе ўпасьці. Шмат іх і каля храма. Наводдаль стаіць жанчына сталага ўзросту. Не заўважыць яе немагчыма: дабрата і інтэлігентнасць адчуваюцца ў незнаёмкі. Разгаварыліся. Яе жыццё – прыклад самаахвярнасці. Яна аб’ехала цэлы свет з сынам-пагранічнікам, пабывала ў шматлікіх «гарачых кропках» планеты, стаўшы яго анёлам-захавальнікам…
Дзень беларускага пісьменства – свята, дзе з народам размаўляюць вякі, дзе гучыць роднае беларускае слова. Дзякуй, Іванава, за гасціннасць, за натхненне, за добры настрой, за тыя сустрэчы, якія немагчыма забыць.

 

Валянціна ХАМЧУК.

 
 
Чтобы разместить новость на сайте или в блоге скопируйте код:
На вашем ресурсе это будет выглядеть так
Дзень беларускага пісьменства – хвалюючае, узнёслае свята роднай мовы, асветы, духоўнасці. А папярэднічае гэтай важнай культурнай падзеі Міжнародная...
 
 
 

РЕКЛАМА

Архив (Разное)

РЕКЛАМА


Яндекс.Метрика