Урачысты марш і кадэцкі баль

Источник материала:

Дзень Саюзнай дзяржавы прайшоў 27 верасня падчас грамадзянска-патрыятычнай змены «За гонар Айчыны». Нагадаем, што ў Нацыянальным дзіцячым адукацыйна-аздараўленчым цэнтры «Зубраня» сабралася больш за 500 хлопцаў
і дзяўчат. Сюды прыехалі дэлегацыі кадэцкіх адукацыйных
устаноў Беларусі, а таксама Краснадарскага краю, Татарстана, Удмуртыі і многіх іншых рэгіёнаў Расіі.
Святочная праграма пачалася з урачыстай лінейкі. Падчас яе адбыліся вынас копіі Сцяга Перамогі, ускладанне кветак да гарматы Героя Савецкага Саюза Пятра Панамарова, якая ўстаноўлена на гістарычным маршруце «Дарогамі мужнасці». Узняўся ў неба святочны феерверк. Удзельнікі змены прайшлі ўрачыстым маршам па плошчы Сяброўства. Іх віталі ганаровыя госці — прадстаўнікі Пастаяннага камітэта Саюзнай дзяржавы, міністэрстваў і ведамстваў Беларусі і Расіі. Сярод іх быў і старшыня Мядзельскай раённай арганізацыйнай структуры ДТСААФ Міхаіл Чаркасаў.
— Спадабалася атмасфера сапраўднага свята, прыгожы парад, рота ганаровай варты з Мінска, якая выканала на плошчы вельмі прыгожыя страявыя практыкаванні са зброяй, — расказаў ён. — Падчас свята прайшла цырымонія ўзнагароджання за актыўны ўдзел у змене, перамогу ў творчых конкурсах, ваенна-спартыўных спаборніцтвах, агульнакамандным заліку і іншых.
У гэты дзень адбылося свята «Славянскай вернасці саюз», дзе была прадстаўлена гісторыя змены, кадэты прадэманстравалі свае навыкі і ўменні. А на кадэцкім балі здзівілі яны гледачоў грацыяй і лёгкасцю ў танцах.

В. Аляксандраў.