3 лістапада аматары палявання адзначылі свята Святога Губерта

Источник материала:

Сёлета ў другі раз па ініцыятыве вядучага паляўніцтвазнаўца Шаркаўшчынскай раённай арганізацыі Беларускага таварыства паляўнічых і рыбаловаў Алега Селяха 3 лістапада аматары палявання адзначылі свята Святога Губерта, тым самым адкрыўшы сезон на здабычу пушных дзікіх жывёл.

Хто ж такі Святы Губерт? Гэта каталіцкі біскуп, які нарадзіўся ў 655 годзе ў Брусельска-Бельгійскай епархіі. Ён вёў свецкае, разгульнае жыццё, напоўненае вяселлем, гулянкамі, вельмі любіў паляванне. Аднойчы ў лесе, калі ў чарговы раз адправіўся здабываць дзікіх жывёл, Губерт заблукаў і ледзь не загінуў, але пачуў незнаёмы голас: “Губерт, калі не вернешся, цябе чакае пекла. Ідзі да біскупа Ламберта, ён скажа табе, што трэба рабіць”. Раптам Губерт убачыў перад сабой аленя з залатым распяццем паміж рагамі. Ён паехаў услед за аленем і такім чынам быў выратаваны. З таго часу яго жыццё карэнным чынам змянілася. Губерт стаў вучнем біскупа, а пасля і сам змяніў яго на гэтым месцы. Усю апошнюю частку жыцця ён будаваў храмы, асвячаў іх, праводзіў службу. Пасля смерці Губерт быў кананізаваны. З таго часу Святы Губерт лічыцца апекуном паляўнічых і леснікоў, рыбакоў, матэматыкаў і спартсменаў. А памяць аб ім адзначаецца 3 лістапада.

У гэты дзень у касцёле Перамянення Пана аграгарадка Германавічы адбылася ўрачыстая Імша ў гонар Святога Губерта. Амаль сорак чалавек — паляўнічых нашага, Браслаўскага і Глыбоцкага раёнаў, а таксама з Мінску — разам са свяшчэннікамі памаліліся перад пачаткам палявання, папрасіўшы абароны ў Святога Губерта. Імшу правялі ксёндз Ян Пугачоў, ксёндз-канонік Валерый з Оршы і ксёндз Уладзімір з Лепеля. Пасля свяшчэннаслужыцелі асвяцілі аўтамабілі, стрэльбы, сабак і саміх паляўнічых, пажадаўшы лёгкага і ўдалага палявання пад заступніцтвам Святога Губерта.

Сяргей РАЙЧОНАК.