Грыбочкі каля масточка…

06.11.2018 — Разное |

Размер текста:: A; A; A

Источник материала:

На мінулым тыдні ў рэдакцыю патэлефанавала Алена Васільеўна Мялік, жыхарка г. Івацэвічы. Яна хацела расказаць пра цуд, які ўбачыла ў гэты дзень на сваім надворку: каля дэкаратыўнага мастка выраслі грыбы – апенькі (на здымку).

Цяпер Алена Васільеўна знаходзіцца ў заслужаным адпачынку, раней працавала на газакампрэсарнай станцыі, дзе любіла дапамагаць у вольны час афармляць клумбы. Марылася пра свой дом, хаця жылі ў кватэры. Шэсць гадоў таму мара здзейснілася: разам з мужам купілі дом па вуліцы Куйбышава райцэнтра. Дзеці – дзве дачкі – ужо дарослыя, ёсць унукі, якім вельмі даспадобы гасціць у бабулі з дзядулем.

У Мялікаў вельмі прыгожы надворак. Тут і рознакаляровы масток, і арэлі для дзяцей, і столік з лавачкай, і нават некалькі вуллёў (хобі зяця). Займаецца гаспадыня і кветкамі: вырошчвае лілеі розных гатункаў, пачала разводзіць ружы. І дрэўцы ў маладым садку дагледжаныя, пабеленыя… А з якой пашанай і любоўю расказвала Алена Васільеўна пра свае дрэўцы, асабліва пра вішаньку, якую ў гэтым годзе давялося ратаваць ад спякоты, кожны дзень шчодра паліваць. Але і аддзячыла дбайных гаспадароў дрэўца: ураджай быў быццам з паўднёвых краін – усе вішні адна ў адну, вялікія, прыгожыя.

Аматар Алена Васільеўна “папаляваць” на грыбы ў лесе. Збірае часцей за ўсё яна іх адна, каб ніхто не замінаў ні натрапіць на грыбное месца, ні атрымаць асалоду ад лясных водараў і пейзажаў.

Напэўна, таму ў такіх далікатных да наваколля людзей і з’явіліся грыбы прама на надворку (пару гадоў таму пад плотам у Мялікаў выраслі шампіньёны).

Прырода ўмее быць удзячнай за дабрату і клопат.

Юлія КАВАЛЁВА, фота аўтара.