Таленавітыя землякі. У складзе гурта “Агонь Аркестр” іграе наш зямляк Аляксандр Сасноўскі. 21.by

Таленавітыя землякі. У складзе гурта “Агонь Аркестр” іграе наш зямляк Аляксандр Сасноўскі

11.11.2018 — Разное |  
Размер текста:
A
A
A

Источник материала:

Многія шчучынцы, якія любяць глядзець тэлевізійныя шоу фармату “Вечерний Ургант”, напэўна, паспелі ацаніць новы праект папулярнага беларускага тэлевядучага Яўгенія Перліна “Макаёнка, 9”, 
які трансліруецца суботнімі вечарамі на канале “Беларусь-1”. Яго гасцямі ўжо сталі Леанід Якубовіч, Сяргей Трафімаў, Аляксандр Саладуха, Анатолій Ярмоленка, Сяргей Бабкін, Дар’я Домрачава і іншыя папулярныя медыйныя персоны. А ці ведаеце вы, што у складзе гурта “Агонь Аркестр”, які гучыць у праграме ў музычных паузах, іграе наш зямляк Аляксандр Сасноўскі? 


– Я рос у вельмі творчай сям’і, – гаворыць Аляксандр. – Мая мама Наталля Паўлаўна – таленавіты мастак, працуе ў розных жанрах. Бацька Сяргей Іванавіч прафесійна займаецца разьбой па дрэве. Не дзіва, што мне таксама захацелася звязаць сваё жыццё з творчасцю. А паколькі заўсёды любіў музыку, то хутка вызначыўся з выбарам. У маёй старэйшай сястры Вольгі, якая ўсур’ёз займалася выяўленчым мастацтвам, была акустычная гітара. Менавіта яна і стала маім першым інструментам.
Бацькі Аляксандра ўсяляк падтрымлівалі захапленне хлопчыка музыкай, прадстаўляючы свабоду выбару. І той у хуткім часе самастойна асвоіў не толькі гітару, але і бас, навучыўся іграць на барабанах.
– Падчас вучобы ў школе я часта прымаў удзел у розных конкурсах мастацкай самадзейнасці, – працягвае наш суразмоўца. – А ў старэйшых класах мяне паклікалі іграць у рок-гурце “Прамы рэпартаж”. Я з задавальненнем згадзіўся і ўзяў у рукі бас-гітару. Падчас інтэнсіўных рэпетыцый атрымаў каштоўны вопыт работы ў калектыве, што мне вельмі спатрэбілася ў будучым. 



Пасля заканчэння школы Аляксандр Сасноўскі паступіў у сталічны Інстытут сучасных ведаў імя А.М. Шырокава, дзе паспяхова асвоіў прафесію культуролага-менеджара, спецыялізацыя – прадзюсіраванне ў сферы мастацтваў.
– Нягледзячы на занятасць на вучобе, я амаль не выпускаў бас-гітару з рук, увесь свой вольны час практыкаваўся, – кажа Аляксандр. – Тады і зразумеў, што хачу дасканала асвоіць менавіта гэты інструмент. Калі адчуў, што дасягнуў дастатковага ўзроўню майстэрства, пайшоў іграць у гурт. Разам з сябрамі мы ігралі аўтарскую музыку, якую запісвалі дома выключна для сябе. Але калектыў у сілу пэўных прычын праіснаваў нядоўга.
Хутка таленавітага шчучынскага музыканта заўважылі ў музычных кругах сталіцы і пачалі запрашаць у розныя камерцыйныя праекты ў якасці “сесіёншчыка”.



– Працаваць у тандэме з вядомымі музыкантамі заўсёды цікава і вельмі карысна для пашырэння кругагляду, – зазначае Аляксандр Сасноўскі. – Нямала паджэмаваў з удзельнікамі гуртоў “Песняры” і “Сябры”, з якімі мы тварылі ў сумесных праектах. Падчас наведвання прафесійных студый, дзе да гэтага запісваліся “Brutto”, Макс Корж і іншыя вядомыя беларускія выканаўцы, даведаўся шмат новага ў тэхнічным плане. Быў прыемна здзіўлены, што на студыі “Белтэлерадыёкампаніі” адзін са сваіх альбомаў запісваў знакаміты на ўвесь свет нямецкі рок-гурт “Rammstein”. 
Паколькі Аляксандру падчас сваёй прафесійнай дзейнасці даводзіцца іграць у розных стылях, то і музыку ён слухае розную. Аднак перавагу аддае якаснай поп-музыцы, а таксама дыска і фанку. А вось сярод бас-гітар, якіх ужо “перабраў” нямала, мае цягу да шасціструнных.
– Зараз маім асноўным гуртом з’яўляецца “Агонь Аркестр”, з якім мы ўжо далі некалькі сольных канцэртаў, – дзеліцца Аляксандр Сасноўскі. – Апошні – ўчора ў Гомелі. Гэта было вельмі яркае і запамінальнае шоу! Ад находжання на адной сцэне з гэтымі людзьмі я адчуваю сапраўдную асалоду і задаволенасць. Не так даўно тэлевядучы Яўгеній Перлін запрасіў нас іграць у праекце “Макаёнка, 9”, і мы з задавальненнем згадзіліся. Да ўсяго ў складзе кавер-гурта “Аганёк бэнд” я часта выступаю ў маленькіх клубах, дзе мы іграем песні гуртоў “Ляпис Трубецкой”, “Звери”, “Король и Шут”, “ Ленинград” і іншых.
Нягледзячы на даволі насычаны канцэртны графік, Аляксандр выдатна сумяшчае хобі і работу – працуе спецыялістам па маркетынгу ў адной з гандлёвых кампаній. А як толькі выдаецца свабодная хвіліна – спяшаецца дадому, дзе яго чакаюць любімая жонка Вікторыя, сын Цімафей і дачушка Тэя.



– Сям’я – гэта самы каштоўны падарунак, які мне прыпаднёс лёс, – зазначае шчучынскі музыкант. – Менавіта каханая і дзеткі з’яўляюцца асноўнай крыніцай майго натхнення. Дома ў нас заўсёды валадараць спакой і гармонія – найлепшы фундамент для творчага развіцця і кар’ернага росту!
Аляксандр КАСПЯРЧУК.
Фота з архіва 
Аляксандра САСНОЎСКАГА.

 
 
Чтобы разместить новость на сайте или в блоге скопируйте код:
На вашем ресурсе это будет выглядеть так
Многія шчучынцы, якія любяць глядзець тэлевізійныя шоу фармату “Вечерний Ургант”, напэўна, паспелі ацаніць новы праект папулярнага беларускага тэлевядучага...
 
 
 

РЕКЛАМА

Архив (Разное)

РЕКЛАМА


Яндекс.Метрика