Моладзь з Германавіч стала пераможцам абласнога і прызёрам рэспубліканскага конкурсу «Квітней, мой лес!»

Источник материала:

Яны вельмі многае ведаюць пра раслінны і жывёльны свет балота “Ельня”, па кольцах на бервяне могуць вызначыць  ўзрост дрэва, а па  кары – нават  расказаць  пра стан яго здароўя. Юныя лесаводы  з Германавіч, якія ўваходзяць у склад школьнага лясніцтва, кожны год сумесна з прадстаўнікамі лясной гаспадаркі праводзяць дастаткова вялікую работу: высаджваюць на тэрыторыі лясных угоддзяў  спачатку сеянцы, а потым і саджанцы  дрэў, рыхтуюць кармушкі для птушак і размяшчаюць іх у лесе, ачышчаюць вялікія лясныя ўчасткі  ад смецця  і праводзяць патруляванне лясоў, а яшчэ —  надзвычай паспяхова  спрабуюць займацца даследчай дзейнасцю.

— У гэтым навучальным годзе 15 вучняў старэйшых класаў Германавіцкай ДС –СШ уваходзяць у склад школьнага лясніцтва.І хоць школьныя лясніцтвы ў сельскіх школах ужо не з’яўляюцца такімі масавымі, як раней, усё ж адарваць дзяцей ад камп’ютараў і зацікавіць іх лесам можна,-упэўнена  настаўніца біялогіі Германавіцкай дзіцячы сад-сярэдняй школы Марына Аляксандраўна Фёдарава, якая ўжо шмат гадоў у сваёй навучальнай установе ўзначальвае работу школьнага лясніцтва. У гэтым годзе трое выпускнікоў Германавіцкай сярэдняй школы, удзельнікі  школьнага лясніцтва, заваявалі перамогу ў абласным этапе юніёрскага ляснога конкурсу “Квітней, мой лес” і трэцяе месца – у фінальным рэспубліканскім этапе дадзенага конкурсу. У ліку пераможцаў абласнога і прызёраў рэспубліканскага этапа  – Елізавета Філіпёнак, Ангеліна Чарняўская і Уладзіслаў Бондар.

Як было адзначана падчас правядзення конкурснай праграмы, школьнікі з розных рэгіёнаў Беларусі , вывучаючы вядзенне лясной гаспадаркі ў сваёй мясцовасці, зацікавіліся гэтым і паспрабавалі прапанаваць кіраўніцтву лесагаспадарчай галіны  сваё бачанне  актуальных праблем.  Так на абласных этапах з усёй краіны лепшымі былі прызнаны  47 работ старшакласнікаў, а ў фінал выйшлі толькі 10 даследчых прац. У іх ліку і работа вучняў Германавіцкага школьнага лясніцтва пад назвай “Ацэнка паспяховасці прыроднага лесааднаўлення хвойных парод  пад полагам спелых насаджэнняў на тэрыторыі школьнага лясніцтва ДЛГУ ”Дзісненскі лясгас”. Юныя аўтары праекта, Елізавета Філіпёнак, Ангеліна Чарняўская і Уладзіслаў Бондар адзначылі важнасць максімальнага захавання біялагічнай разнастайнасці падроста гаспадарча  каштоўных парод, тым самым забяспечваючы безупыннае малазатратнае  лесааднаўленне.” Гэты праект прынёс моладзі з Германавіч трэцяе месца ў рэспубліканскім конкурсе “Квітней, мой лес” (намінацыя “Устойлівае лесакіраванне”).

Свой цікавы праект для ўдзелу ў рэспубліканскім конкурсе падлеткі рыхтавалі пад кіраўніцтвам кіраўніка школьнага лясніцтва Марыны Аляксандраўны Фёдаравай і памочніка ляснічага Германавіцкага лясніцтва Сяргея Уладзіміравіча Малыша. А паездкі  ў Віцебск і Мінск для ўдзельнікаў конкурсу  арганізавалі ляснічы Германавіцкага лясніцтва Сяргей Багуслававіч Мятлёнак і намеснік дырэктара  па ідэалагічнай рабоце  ДЛГУ “Дзісненскі лясгас” Алена Леанідаўна Конах. Ужо не першы год на тэрыторыі Германавіцкага лясніцтва і лесагадавальніка ( размешчанага непадалёку ад аграгарадка Лужкі), які належыць дзяржаўнай лесагаспадарчай установе “Дзісненскі лясгас”, вучні з Германавіч паспяхова займаюцца практычнай і даследчай дзейнасцю, пад кіраўніцтвам работнікаў лесу выконваюць шматлікія віды лесагаспадарчых работ .

-У наступным годзе Германавіцкаму школьнаму лясніцтву споўніцца 50 год,- адзначыў памочнік ляснічага  Сяргей Уладзіміравіч Малыш. –Гэта аб’яднанне па інтарэсах  не толькі прывучае дзяцей любіць прыроду і знаёміцца з яе таямніцамі, але і дапамагае вызначыцца з  будучай прафесіяй. Для некаторых старшакласнікаў, магчыма, работа ў школьным лясніцтве стане першай прыступкай на шляху ў лясную гаспадарку. Так, ужо ў гэтым годзе адна з актыўных удзельніц школьнага лясніцтва, выпускніца Германавіцкай школы Елізавета Філіпёнак паступіла на вучобу ў Полацкі дзяржаўны лясны тэхнікум – філіял установы адукацыі “Беларускі дзяржаўны тэхналагічны ўніверсітэт”.

Вольга ЧАРНЯЎСКАЯ.