В Ушачах чествовали работников сельского хозяйства. 21.by

В Ушачах чествовали работников сельского хозяйства

20.11.2019 — Разное |  
Размер текста:
A
A
A

Источник материала:

Зала раённага цэнтра культуры і народнай творчасці 16 лістапада напаўнялася намнога раней афіцыйнага пачатку ўрачыстасці. Дэлегацыі сельскагаспадарчых прадпрыемстваў заўсёды прыязджаюць загадзя, каб пагутарыць з калегамі, пазнаёміцца з выставамі, падрыхтаванымі для іх работнікамі хлебазавода, Дома рамёстваў, бібліятэкі і іншых устаноў. Ды і жадаючых пабачыць дзейства, прысвечанае святу аграрыяў, таксама шмат, таму яны спяшаюцца займаць месцы. Вось і сёлета запатрабавана была нават галёрка. Мерапрыемства ж атрымалася насычаным і цікавым: на сцэну падымалася намнога больш, чым звычайна, працаўнікоў сяла, былі і адметныя ўзнагароды, напрыклад, юбілейны медаль “100 год органам дзяржаўнага кіравання сельскай гаспадаркай і харчаваннем Беларусі”.

Іх атрымалі ветэраны працы А.В.Шарыпенка і У.А.Крывапушчанка, якія ўзначальвалі вялікія калектывы на працягу дзесяцігоддзяў, а таксама перадавыя механізатары ААТ “Ільюшынскі” і КУСГП “Вялікадолецкае” Анатоль Дзмітрыевіч Спірыдзёнак і Сяргей Аркадзьевіч Філімонаў. Дзякуючы наватарскім пачынанням У.А.Крывапушчанкі “Дружба” заўсёды была флагманам сярод сельгаспрадпрыемстваў раёна і вобласці, А.В.Шарыпенка доўгі час утрымліваў у лідэрах саўгас-камбінат “Арэхаўна”, у які ўваходзіў і свінагадоўчы комплекс, а потым не проста захаваў маленькі “Дземенец”, а і прымусіў “загучаць”, значна пашырыўшы яго межы. Ён не змог прыйсці на свята (узнагароду атрымлівала яго жонка Людміла Міхайлаўна), але па-ранейшаму цікавіцца як станам спраў сваёй гаспадаркі, так і раёна. Канечне, як і У.А.Крывапушчанка. Наогул былых работнікаў сельскай гаспадаркі не бывае. Вось і запрошаныя на свята ветэраны райсельгасхарча В.В.Падвойская, З.Я.Кудраўцава, В.Э.Ісаковіч, А.М.Слашчова вельмі ўважліва ўглядаліся ў экран, слухалі аналітычнае выступленне старшыні райвыканкама, бо параўноўвалі, прыгадвалі часы, калі наш раён невыпадкова называлі аграрным – у гэтай сферы былі заняты тысячы ушачан – пераважная большасць працаздольнага насельніцтва.

“Перад намі стаіць задача – захаваць сяло. Падтрымліваючы сельскую гаспадарку, мы забяспечваем дынамічнае развіццё дзяржавы, бо харчовая бяспека – фундамент рэальнай незалежнасці любой краіны”, – з такой думкі пачаў сваю прамову на ўрачыстасці кіраўнік раёна У.Г.Аўдошка. І прыемна канстатаваць, што сёлета намецілася станоўчая тэндэнцыя ў дзейнасці аграрнай галіны Ушаччыны. Так, тэмп росту вытворчасці прадукцыі раслінаводства склаў 106 працэнтаў да леташняга ўзроўню, валавы збор зерня – 20521 тону (149 працэнтаў), алейных культур – 1262 (109,6), нарыхтавана больш 28 тысяч тон сенажу і больш 23 – сіласу (102 і 107,4 працэнта адпаведна), атрымана 1890 тон мяса свініны і 842 – буйной рагатай жывёлы. Закладзены пэўны падмурак і для новага ўраджаю: пасеяна 5178 гектараў зерневых і зернебабовых, 1665 – алейных культур. Паспяхова рэалізуюцца інвестыцыйныя праекты, пад якія былі перададзены невыкарыстоўваемыя аб’екты: у надзвычай хуткія тэрміны адкрыты вытворчы ўчастак па вырошчванні свіней “Хадакова” філіяла “Зара” ЗАТ “Вітаграпрадукт”, ёсць падставы меркаваць, што ўжо ў лютым з’явяцца гадаванцы і на былой МТФ “Слабада”.

І за ўсімі станоўчымі лічбамі стаяць людзі. А іх у аграрнай галіне з кожным годам, на жаль, становіцца менш. Уладзімір Генадзьевіч прывёў красамоўныя лічбы: калі ў былыя гады толькі ў адных “Глыбачанах” працавала больш 1000 чалавек, то зараз ва ўсіх гаспадарках раёна іх засталося 648. Пачынаючы з 2012-га штогод колькасць работнікаў змяншалася прыкладна на 100 чалавек, сёлета, праўда, адток быў не такім значным – галіну пакінулі 10 працаўнікоў. Зрэшты, гэта яшчэ не самыя катастрафічныя лічбы: у Расонскім раёне, да прыкладу, засталося ўсяго 340 аграрыяў. Такім чынам, як ні парадаксальна, Ушаччыну сельскагаспадарчым рэгіёнам зараз назваць ужо нельга: у суме агульнай выручкі ад тавараў, работ і паслуг “аграрны ўнёсак” склаў па апошніх даных усяго 27 працэнтаў, тады як, напрыклад, гандлёвая сфера прынесла 48. Каб пераламаць тэндэнцыю, трэба ствараць годныя ўмовы працы і быту, плаціць дастойную зарплату, заахвочваць моладзь. І прыклады такія ў рэгіёне ёсць: на тым жа прадпрыемстве “Ларынаўка”, што на Аршаншчыне, сярэдні ўзрост работнікаў – каля 30 год, а зарабляюць яны парадку 1500 рублёў.

Але ці могуць спадзявацца на нешта падобнае ў гаспадарках нашага раёна? У.Г.Аўдошка мяркуе, што падставы для гэтага ёсць: “Зараз мы напярэдадні эпахальнай падзеі: падпісання ўказа па стварэнні холдынгу “Віцебскі экапрадукт”. Аграрыі скардзіліся, што, маўляў, мы вырабляем прадукцыю, а нехта забірае, перапрацоўвае і атрымлівае дадатковы прыбытак. Зараз жа ўсё будзе, як кажуць, “у адной кішэні”. Гаспадаркам дадуць шанс пачаць “з чыстага ліста”: іх даўгі забярэ на сябе кіруючая кампанія. З’явіцца магчымасць выйсці з замкнёнага кола – забяспечыць вытворчасць сучаснай тэхнікай і аб’ектамі жывёлагадоўлі, па тэхналогіі весці сяўбу, а значыць, атрымліваць большы ўраджай і, адпаведна, павялічваць заробкі… Трэба быць аптымістамі, рухацца далей. Усё ў нашых руках!”

Вельмі працяглы час не сыходзіў са сцэны Уладзімір Генадзьевіч, паколькі ўручаў не толькі Ганаровыя граматы і Падзякі райвыканкама (імёны іх уладальнікаў мы друкавалі ў мінулым нумары), але і ўзнагароды галіновых органаў. Ганаровую грамату Міністэрства сельскай гаспадаркі і харчавання атрымала жывёлавод ААТ “Ільюшынскі” Антаніна Уладзіміраўна Бірукова, падзяку Міністра – механізатар ААТ “Агра-Селішча” Алег Юльянавіч Крывёнак. Гэты сціплы трактарыст штогод задзейнічаны літаральна на ўсіх відах работ, таму не трапіў у лік пераможцаў у нейкай асобнай намінацыі. Тым не менш на ім і яшчэ некалькіх такіх жа безадказных работніках трымаецца гэта гаспадарка. Таму менавіта яму і дастаўся асаблівы падарунак – мабільны тэлефон, які на святкаванні 95-годдзя Ушацкага раёна ўручыў дырэктар інтэграцыйнай структуры “Полацкі камбінат хлебапрадуктаў” В.К.Хамёнак. Тады старшыня райвыканкама і паабяцаў уручыць яго аднаму з лепшых механізатараў раёна.

Ганаровую грамату камітэта па сельскай гаспадарцы і харчаванні аблсельгасхарча атрымаў механізатар ААТ “Ільюшынскі” Аляксандр Пятровіч Майсеенка і яго малады калега з “Дземенца” Іван Віктаравіч Цароў. Падзяка камітэта была ўручана трактарысту-машыністу КУСГП “Глыбачаны” Генадзю Леанідавічу Качану і жывёлаводу ААТ ”Ільюшынскі” Алегу Іванавічу Жуку. Лісты падзякі старшыні райвыканкама атрымалі кіраўнікі лясгаса, ДРБУ-105, камунгаса, прадпрыемства меліярацыйных сістэм за дапамогу, якую шэфы аказвалі на працягу ўсіх сельскагаспадарчых кампаній.

Вельмі многа на гэты раз у зале было маладых спецыялістаў, якім у раёне ўдзяляецца вялікая ўвага. Старшыня райвыканкама У.Г.Аўдошка ўручыў Лісты падзякі васямнаццаці юнакам і дзяўчатам, якія годна адпрацавалі сельскагаспадарчы цыкл поплеч з вопытнымі калегамі. Прыемна, што сярод іх 15 ураджэнцаў Ушаччыны, якія працягваюць справу сваіх родных. Побач з бацькамі ў кабіне трактара з задавальненнем бавілі вольны час Ілья Апёнак з “Маяка-Ушацкага” і Ілья Спірыдовіч з “Дземенца”, а зараз самі рыхтавалі глебу ці перавозілі збажыну. На зернетоку не адны канікулы правёў і Павел Шарох з апошняй гаспадаркі, які вярнуўся сюды дыпламаваным спецыялістам. І калі не хапае вопыту тэхніку-механіку, звяртаецца да старэйшых калег, сярод якіх неаднаразовы пераможца жніва Аляксандр Уладзіміравіч Яловік. Спецыяльнасць дзеда Міхаіла Фёдаравіча Мамонава, былога кіраўніка калгаса “Прагрэс” абраў Вадзім, які зараз працуе інжынерам па ахове працы ў КУСГП “Вялікадолецкае”. Яшчэ падчас практыкі ў гаспадарках раёна былі заўважаны кіраўніцкія здольнасці Крысціны Жарнасек, якой адразу даверылі пасаду намесніка галоўнага ветэрынарнага ўрача – брыгадзірам саўгаса “Ушацкі” ў свой час працаваў яе дзед Ігнат Адамавіч Валадзько.

Ужо не першы год менавіта з раённай сцэны віншуюць сваіх пераможцаў кіраўнікі сельгаспрад­прыемстваў. Да зямлі пакланіўся механізатарам “Полацкага камбіната хлебапрадуктаў” Юрыю Генадзьевічу Кісляку і Рыгору Дзмітрыевічу Курносаву дырэктар КУСГП “Глыбачаны” Алег Аляксандравіч Ляшчынскі. Прэміі таксама ўручылі працаўнікам “Ільюшынскага” Сяргей Анатольевіч Халімоненка, “Маяка-Ушацкага” – Аляксандр Яўгенавіч Шкодзін, “Дземенца” – Генадзь Аляксандравіч Шалыга. Зразумела, што кіраўніцтва гаспадарак стварала ўмовы, каб усе намінанты змаглі прыехаць на свята. А як мяняліся людзі! Хоць дзень таму сустракаліся з Аксанай Аляксандраўнай Дзіульскай, ледзь пазнала ў маладой жанчыне ў гіпюравай сукенцы даглядчыка комплексу “Маяк”. Падзівіліся, як спраўляецца з каровамі проста мініяцюрная Кацярына Уладзіміраўна Чумакова з “Ільюшынскага”. Аляксандр Селезень з апошняй гаспадаркі па такому выпадку нават пагаліў сваю модную бараду. Хоць і былі пры касцюмах з гальштукамі Аляксандр Мікалаевіч Гусёнак – цяпер ужо з “Дземенца” і Сяргей Міхайлавіч Вусько з “Вялікадолецкага”, аднак гэта толькі маладзіла механізатараў. Апошні атрымаў Ганаровую грамату і прэмію як пераможца жніва з рук начальніка райсельгасхарча Сяргея Сяргеевіча Садоўскага – імёны лідараў па ўсіх намінацыях мы таксама друкавалі ў папярэднім нумары. А вось А.М.Гусёнак – Ганаровую грамату абласнога прафсаюза работнікаў аграпрамысловага комплексу. Яе, як і граматы і падзякі раённай галіновай прафсаюзнай арганізацыі старшыня Пётр Аляксандравіч Алексяёнак уручыў таксама Мікалаю Аляксандравічу Саўчанку – аператару комплексу “Маяк”, Ірыне Сяргееўне Маслюк – бухгалтару філіяла “Сарочына”, Віктару Васільевічу Кажану – ветурачу філіяла “Ушацкі”, Аксане Браніславаўне Любельскай – вядучаму ветурачу райветстанцыі.

Усе ў гэты дзень былі прыгожымі і вясёлымі. Спрыяў настрою і ўдалы канцэрт, падрыхтаваны супрацоўнікамі раённага цэнтра культуры, дзіцячай школы мастацтваў, самадзейнымі артыстамі. Трапна ляглі па тэме вясковая сцэнка, вакальныя і харэаграфічныя нумары, цымбалы. І, канечне, з задавальненнем прымалі на сцэне працаўнікі сяла сваіх артыстаў. Перш за ўсё для Галіны Канстанцінаўны і Валерыя Уладзіміравіча Літвін спявала іх нявестка Валянціна, для кіраўніка “Дземенца” Г.А.Шалыгі і дэлегацыі гаспадаркі – яго пляменнік Кірыл. У зале не было абыякавых, бо літаральна ўсе мы маем дачыненне да сельскай гаспадаркі і раздзяляем радасць з прадстаўнікамі самай пачэснай прафесіі.

Наталля Багдановіч, Вольга Караленка.

 
 
Чтобы разместить новость на сайте или в блоге скопируйте код:
На вашем ресурсе это будет выглядеть так
Зала раённага цэнтра культуры і народнай творчасці 16 лістапада напаўнялася намнога раней афіцыйнага пачатку ўрачыстасці. Дэлегацыі сельскагаспадарчых...
 
 
 

РЕКЛАМА

Архив (Разное)

РЕКЛАМА


Яндекс.Метрика