21 кастрычніка бягучага года адбыўся абласны этап рэспубліканскага конкурсу юных экскурсаводаў “Мая малая радзіма” ў рамках акцыі “Жыву ў Беларусі і тым ганаруся”. Добрушскі раён у гэтым конкурсе прадстаўлялі гімназія горада Добруша і Насовіцкая сярэдняя школа.
Мне неаднойчы даводзілася выступаць з абаронай даследчых работ і конкурсаў, нават у рэспубліканскім лагеры “Зубраня”, але я ніколі так не хвалялвалася, як на гэты раз. За 10 хвілін патрэбна было творча прадставіць гісторыка-культурныя, сацыяльныя, прыродныя адметнасці сваёй малой радзімы.
Вядома, да гэтага конкурсу я рыхтавалася загадзя. З дапамогай настаўнікаў быў створаны відэафільм правядзення маёй экскурсіі ў школьным гісторыка-краязнаўчым музеі, падрыхтавана прэзентацыя даследчай працы “Повязь часоў у лёсе маёй вёскі”.
З дапамогай майго кіраўніка Віктара Пятровіча Серпікава быў складзены тэкст экскурсіі па малой радзіме, менавіта па вёсцы Насовічы, галоўным чынам у вершаванай форме. Да таго ж, у заключэнні я спявала песню пра родную вёску, якая была напісана таксама да гэтай падзеі.
У конкурсе юных экскурсаводаў прымалі ўдзел пераможцы адборачных тураў абласнога этапу – усяго 15 навучэнцаў з розных устаноў адукацыі Гомельскай вобласці.
Хваляванне не пакідала ні на хвіліну, хаця з многімі ўдзельнікамі конкурсу я была знаёма асабіста.
Строгае журы сачыла не толькі за творчым майстэрствам экскурсавода, але і за мовай, уменнем пераканаўча данесці матэрыял, зацікавіць слухачоў, зрабіць усё так, каб ім захацелася наведаць той ці іншы куточак Беларусі.
Маё выступленне адзначана дыпломам першай ступені. Усе ўдзельнікі прымуць удзел у рэспубліканскім этапе, які будзе праходзіць у снежні гэтага года на Нарачы ў лагеры “Зубраня”. Яна БОНДАРАВА, вучаніца 10 класа Насовіцкай сярэдняй школы
21 кастрычніка бягучага года адбыўся абласны этап рэспубліканскага конкурсу юных экскурсаводаў “Мая малая радзіма” ў рамках акцыі “Жыву ў Беларусі і тым...
Главная
Гороскопы
