Новага рэктара ЕГУ назавуць заўтра. Мілінкевіч: "Важна, каб універсітэт захаваў беларускасць"

Источник материала:

Чакаецца, што імя новага рэктара Еўрапейскага гуманітарнага ўнівэрсітэта (ЕГУ) будзе названа 2 сакавіка. На гэты дзень запланаваны агульны сход заснавальнікаў ЕГУ, падчас якога павінна быць прынятае адпаведнае рашэнне.

Пасада рэктара стала вакантнай пасля таго, як у верасні 2014 году яе пакінуў Анатоль Міхайлаў, які заснаваў універсітэт і кіраваў ім з моманту яго стварэння. Шорт-ліст прэтэндэнтаў складаецца з шасьці імёнаў. Гэта трое грамадзян Беларусі – лідар руху "За Свабоду" Аляксандар Мілінкевіч, гісторык Алесь Краўцэвіч і філосаф Таццяна Шчытцова. І тры грамадзяніна ЗША – Дэвід Полік, ён зараз выконвае абавязкі рэктара, прарэктар па развіцці і камунікацыі Дарыюс Удрыс і дырэктар офіса Інстытута міжнароднай адукацыі (Масква) Эдвард Рослаф.




"Для мяне самае важнае не асабісты лёс, хоць ёсць амбіцыі, ёсць жаданне, – сказаў сёння Свабодзе Аляксандар Мілінкевіч. – Я лічу, што гэта вельмі важны ўніверсіытэт. Гэта вельмі важны і складаны праект. Але я думаю болей пра ўніверсітэт, як і многія актыўныя беларусы.

Вельмі важна, каб універсітэт захаваў беларускасць. Не трэба спрошчана думаць, што беларускасць гэта выключна беларуская мова. Там будуць і руская, і ангельская, і французская мовы. Хоць беларуская мусіць дамінаваць.

І калі гаворка ідзе пра беларускасць, то гэта трэба разумець як служэнне Беларусі".

"Я да гэтых усіх справаў стаўлюся спакойна – гаворыць Алесь Краўцэвіч. – Я не бачу ў гэтым справы жыцця і смерці. Я па-ранейшаму працую над гісторыяй Вялікага княства Літоўскага. Днямі ў мяне выйшла чарговая кніжка па сінтэзу ВКЛ.

Калі мяне абяруць рэктарам, я паеду і буду працаваць у ЕГУ. З усё той аддачай, на якую я толькі здольны. Лічу, што гэта інстытуцыя для нашай краіны надзвычай важная. Менавіта яна павінна стаць кузьняй нацыянальных кадраў".

Еўрапейскі гуманітарны ўніверсітэт быў адкрыты ў Мінску ў 1992 годзе. У 2004-м беларускія ўлады, незадаволеныя самастойнасцю яго кіраўніцтва, зачынілі ВНУ. Праз год ён аднавіў працу ў Вільні, дзе мае статус беларускага ўніверсітэту ў выгнанні. У ім вучацца прыкладна паўтары тысячы студэнтаў, пераважна з Беларусі.