Адкрыцця рэтра-кiнатэатра давядзецца пачакаць

Источник материала:

КIНО

Кiнатэатр «Цэнтральны» быў зачынены для гледачоў яшчэ восенню 2000 года па прычыне аварыйнага стану памяшкання. За больш чым 40 гадоў свайго iснавання ў iм нi разу не праводзiўся капiтальны рамонт. Знаходзiцца ён у жылым будынку, якi ахоўваецца дзяржавай як помнiк архiтэктуры, што значна ўскладнiла рамонтныя работы.

На сённяшнi дзень у кiнатэатры ўжо поўнасцю перакладзены iнжынерныя сеткi, заменена сiстэма ацяплення, вентыляцыi, электразабеспячэння, гукаiзаляцыi з улiкам ўстаноўкi сiстэмы стэрэагуку DOLBI i г.д. Фактычна будаўнiкi са сваёй задачай справiлiся своечасова. А вось рэстаўрацыйныя работы аказалiся куды больш складанымi, чым гэта меркавалася раней, што прывяло не толькi да дадатковых выдаткаў на ажыццяўленне праекта, але i да пераносу адкрыцця кiнатэатра на студзень наступнага года.

Кiнатэатру «Цэнтральны» мяркуецца вярнуць яго гiстарычны выгляд: фасад i фае кiнатэатра зноў будуць выглядаць як i ў сярэдзiне XX стагоддзя. Разам з тым глядзельная зала на 240 месцаў абсталявана па самых сучасных мерках. Памiж мiнiстэрствамi культуры Беларусi i Расii, Мiнгарвыканкамам i УП «Кiнавiдэапракат» было дасягнута пагадненне аб адкрыццi на базе кiнатэатра «Цэнтральны» Цэнтра расiйска-беларускай кiнематаграфii, дзе будуць дэманстравацца ўсе навiнкi айчыннага i расiйскага кiно. Улiчваючы знаходжанне кiнатэатра ў самым ажыўленым месцы беларускай сталiцы, можна не сумнявацца, што яго зала нiколi не будзе пуставаць. Калiсьцi гэта быў адзiн з нямногiх мiнскiх кiнатэатраў, якi збiраў гледачоў нават на ранiшнiя сеансы. Аднак без падарунка на Каляды мiнчане ўсё ж такi не застануцца. 26 снежня адразу ў трох кiнатэатрах («Кастрычнiк», «Перамога» i «Аўрора») адбудзецца прэм’ера працягу фiльма аб прыгодах Гары Потэра — «Гары Потэр i тайны пакой». Дарэчы, нягледзячы на агульную «потэраманiю» лiдэрам пракату 2002 года фiльм «Гары Потэр i фiласофскi камень» усё ж такi не стаў. Найбольшую глядацкую аўдыторыю сабраў вiдовiшчны «Уладальнiк пярсцёнкаў», якi пажадалi ўбачыць на вялiкiм экране 153 тысячы мiнчан. Лiдэр пракату 2001 года — фiльм «Пiрл Харбар» — прыцягнуў у кiнатэатры 175 тысяч жыхароў i гасцей сталiцы.