Даўгабуд закончыўся наваселлем

Источник материала:

З панядзелка сюды перайшлi вучыцца 16 пачатковых класаў школы № 30. 325 дзяцей атрымалi выдатныя ўмовы для занят-каў, адпачынку, развiцця сваiх разнастайных здольнасцяў. Новая школа мае эстэтычны ўхiл. Тут ёсць класы i залы для заняткаў музыкай, танцамi, iншымi вiдамi мастацтваў. Басейн, спартыўная зала паспрыяюць умацаванню здароўя юных гаспадароў школы.

Павiншаваць дзяцей, iх бацькоў, настаўнiкаў з наваселлем прыйшлi кiраўнiкi вобласцi, горада, Маскоўскага раёна Брэста. Старшыня аблвыканкама Канстанцiн Сумар (на фота першы злева) выказаў спадзяванне, што ў новай школе ўсе будуць старанна вучыцца, i з яе сцен выйдуць таленты, якiя праславяць нашу краiну, як гэта зрабiла летась iх равеснiца Ксенiя Сiтнiк. Губернатар падарыў саду-школе неабходнае для вучэбнага працэсу мультымедыйнае абсталяванне. У тым, што дзяржаўным мужам будзе каму перадаць кiраўнiчую эстафету, не было падстаў сумнявацца. У трэцiм класе, куды зайшлi кiраўнiкi горада i рэгiёна, знайшлося пяцёра жадаючых стаць неўзабаве мэрам Брэста. Усе, хто прыняў удзел ва ўрачыстым адкрыццi, былi аднадушныя ў тым, што дзецi мiкрараёна Кавалёва атрымалi добры падарунак. Камп’ютарныя класы для вучняў, гульнявыя пакоi для выхаванцаў садка, — усё падрыхтавана i абстаўлена ў самых сучасных традыцыях. Варта дадаць, што адкрытая на Стары Новы год сад-школа стала першым такiм аб’ектам у горадзе над Бугам за апошнiя сем гадоў. А цяпер, паводле слоў старшынi гарвыканкама Аляксандра Палышэнкава, такiя наваселлi будуць адзiн за адным. Ужо налета адкрыецца дзiцячы сад у густанаселеным мiкрараёне Вулька, а потым i сад-школа ў новым шостым мiкрараёне.