Пачатак года не азмрочаны для чытачоў сур’ёзнымi праблемамi

Источник материала:

«Гарачы» тэлефон «Звязды» 287-17-41

З пасёлка Ленiна Горацкага раёна дзяўчыну цiкавiла, калi ў iх населеным пункце з’явiцца антэна аператара сотавай сувязi X. Маладога чалавека турбавала праблема: чаму аператар Y. не знiжае тарыфы на размовы, маючы такую вялiкую «армiю» абанентаў. Што можна было адказаць нашым заяўнiкам? Па-першае, кожны аператар сотавай сувязi (а памiж сабой яны яшчэ i канкурэнты) будуе ўласную канцэпцыю развiцця, таму наўрад цi раней часу будзе агучваць свае планы, па-другое, любое згадванне ў друку ў даным кантэксце назвы таго цi iншага аператара — гэта рэклама, якую ва ўсiм цывiлiзаваным свеце прынята размяшчаць у сродках масавай iнфармацыi на платнай аснове. Па той жа прычыне мы не змаглi дапамагчы чытачу з Бабруйска, якi прасiў расказаць пра энергазберагальныя лямпачкi (ды i зацiкавiла б гэтая iнфармацыя, напэўна, нямногiх).

Мiнчанiн Казiмiр Аляксеевiч Мурашка паскардзiўся, што зараз у аптэках без рэцэпта нельга купiць настойку сардэчнiку. Аб гэтых новаўвядзеннях мы ўжо пiсалi падрабязна раней, таму ў данай сiтуацыi толькi i змаглi прапанаваць чытачу выказаць свае прапановы i незадаволенасць па «гарачай лiнii» Мiнiстэрства аховы здароўя (т. 222-70-80). Вiдавочна, голас у тым лiку i Казiмiра Аляксеевiча быў пачуты, паколькi ў перспектыве плануецца пашырыць спiс лекаў, якiя можна будзе набываць у аптэках без рэцэпта ўрача (i памянёную настойку сардэчнiку таксама).

З Ляхавiцкага раёна звярнулася жанчына, мацi пачынаючага, як яна сказала, прадпрымальнiка. Яе сын па дагавору аказваў паслугi мясцоваму раённаму спажывецкаму таварыству. I вось ужо некалькi месяцаў апошняе не выплачвае яму даволi вялiкую суму грошай. Паколькi ў сына на руках ёсць афiцыйныя паперы, самы просты i надзейны спосаб атрымаць заробленае — гэта падаць на арганiзацыю ў суд, патрабуючы яшчэ i выплаты маральнай кампенсацыi. Жанчына ў вынiку цалкам пагадзiлася з гэтай парадай.

Жанчыну-iнвалiда III групы з Мiнска хвалюе кватэрнае пытанне. Прайшоўшы, на яе погляд, усе магчымыя iнстанцыi, яна напiсала ў Адмiнiстрацыю Прэзiдэнта, адкуль ёй прыйшоў адказ, што лiст накiраваны на разгляд у адмiнiстрацыю яе раёна. Адтуль рэагавання яна пакуль не атрымала, аднак, запэўнiлi мы заяўнiцу, яе пытанне абавязкова будзе разгледжана ў адпаведнасцi з заканадаўствам, i ўмяшання газеты пасля такой уплывовай установы, як Адмiнiстрацыя Прэзiдэнта, не спатрэбiцца. Адзiнае, папярэдзiлi мы жанчыну, яе праблема будзе разглядацца так, як прадпiсваюць законы, а не так, як хацелася б асабiста ёй. Таму цi будзе яна задаволена канчатковым адказам, сказаць цяжка.

Было даволi шмат зваротаў ад чытачоў даведачнага характару: калi цiкавiлiся адрасам архiва, тэлефонам пэўнай установы цi арганiзацыi i г.д. Па пытаннях, якiя паўтаралiся, мы раiлi заяўнiкам звярнуцца да нашых ранейшых публiкацый. Словам, як бачна, сур’ёзныя эканамiчныя, сацыяльныя праблемы нашых заяўнiкаў, на шчасце, не турбавалi. Калi ж яны з’явяцца, мы гатовы выслухаць кожнага чытача i па магчымасцi аказаць яму пасiльную дапамогу ў iх вырашэннi. Тэлефануйце!