Парны прагляд

Источник материала:

Паводле слоў галоўнага рэжысёра Дома кiно Аляксандра Богдана, «Сеанс для дваiх» не абмяжуецца выключна «сусальнымi меладрамамi» — у праграму патрапяць фiльмы самых розных жанраў i стыляў. Так, у блiжэйшы час гледачам збiраюцца прапанаваць карцiны «Гонар i прадузятасць» (ЗША—Англiя), «Казанова» (ЗША), «Алiбi» (ЗША—Канада), «Мемуары гейшы» (ЗША, прэтэндэнт на «Оскар-2006»), «Басанож па маставой» (Германiя). На дадзены момант прыкладная праграма «Сеансу для дваiх» уключае ўжо каля 30 фiльмаў.

Перавага будзе аддавацца прэм’ерам i новаму кiно. Аднак неўмiручая класiка з кадру не выпадзе, таксама як i найбольш упадабаныя беларускiмi гледачамi фiльмы. Напрыклад, карцiна «Басанож па маставой» ужо iшла ў мiнскiм пракаце, але настолькi палюбiлася гледачам, што ад яе паўтору i Дом кiно, i наведвальнiкi толькi выйграюць, лiчыць Аляксандр Богдан. Больш за тое, улiчваючы праяўлены да карцiны iнтарэс, зараз абмяркоўваецца магчымы прыезд у Мiнск рэжысёра, аўтара iдэi i выканаўцы галоўнай ролi Цiля Швайгера (у нас вядомы найперш па карцiне «Дастукацца да нябёсаў»).

«Сеанс для дваiх» задуманы як доўгатэрмiновы праект. «Мы хочам прыцягнуць найбольш рамантычную частку аўдыторыi, — гаворыць Аляксандр Богдан. — З гэтай мэтай мяркуем праводзiць рэгулярныя розыгрышы прызоў i рабiць iншыя прыемныя сюрпрызы».

Але гэтым навiны Дома кiно не вычэрпваюцца. У блiжэйшы час тут стартуе яшчэ адзiн новы праект, прысвечаны знакамiтым асобам сусветнага кiнематографа — «Вялiкiя iмёны». Напрыканцы лютага — у пачатку сакавiка на базе Дома кiно будзе створаны кiнаклуб, у якiм будуць праходзiць дыспуты, сустрэчы, абмеркаваннi. На 24 сакавiка запланавана правядзенне юбiлейнага вечару народнага артыста Расii i Беларусi Уладзiмiра Гасцюхiна. А летам, верагодна ў чэрвенi, у рамках фестывалю кароткаметражнага кiно «IнтэрФiльм-Усход» мiнчанам прапануецца праграма лепшых фiльмаў, знятых на... мабiльныя тэлефоны.