Жанчын просяць пачакаць...

Источник материала:

НА ШТО СКАРДЗIМСЯ?

Для большай зручнасцi мясцовых жыхароў быў зменены графiк прыёму па асабiстых пытаннях, якi право-дзяць супрацоўнiкi выканаўчага камiтэта. Да намеснiкаў старшынi цяпер можна трапiць на прыём штомесяц па суботах з 9.00 да 11.00. Акрамя таго, па суботах у райвыканкаме арганiзавана работа грамадскай юрыдычнай прыёмнай, дзе мясцовыя жыхары атрымлiваюць бясплатную кансультацыю. Улiчваючы аддаленасць ад раённага цэнтра горада Белаазёрска, кожны тыдзень па пятнiцах з 10.00 да 13.00 там вядуць прыём спецыялiсты ўпраўлення па працы i сацыяльнай абароне, аддзела па будаўнiцтву i архiтэктуры, iнспекцыi Мiнiстэрства па падатках i зборах па Бярозаўскаму раёну, раённага цэнтра занятасцi. Да iх жа звяртаюцца i жыхары Спораўскага, Пескаўскага i Белаазёрскага сельсаветаў, размешчаных побач з Белаазёрскам.

У раёне iснуюць чатыры вёскi, якiя «не маюць перспектыў дэмаграфiчнага развiцця», а прасцей кажучы, з’яўляюцца вымiраючымi — Перасудавiчы, Мастыкi, Батарэя, Бармуты. Для таго, каб больш поўна вырашаць сацыяльныя праблемы састарэлых жыхароў, арганiзаваны Дамы сацыяльных паслуг. Туды па графiку выязджаюць медыцынскiя работнiкi, супрацоўнiкi камбiната бытавога абслугоўвання, гандлю, там жа праводзяцца царкоўныя абрады.

Па характару ўзнiмаемых пытанняў на першым месцы стаяць праблемы камунальнай гаспадаркi (23,9 працэнта), за iмi iдуць пытаннi жылля (20,8 працэнта), далей — працы (10 працэнтаў), забеспячэння занятасцi (7,2 працэнта), сацыяльнага забеспячэння (5,8 працэнта), сельскай гаспадаркi (3,8 працэнта), пасажырскага транспарту (2 працэнты). Найбольш рэзкае павелiчэнне зваротаў грамадзян датычыцца дзяржпошлiны за падачу ў суд iскавай заявы — у асноўным на ўстанаўленне права на спадчыну. Людзi просяць вызвалiць iх ад уплаты пошлiны. Калi ў 2003 годзе з гэтым звярнулася 5 чалавек, у 2004 годзе — 20, то ў 2005-м ужо 61 чалавек.

Не знiжаецца ў раёне актуальнасць праблемы занятасцi, асаблiва жаночай. Узровень беспрацоўя на 1 сакавiка 2006 года склаў 2,7 працэнта i год ад году павялiчваецца. На ўлiку ў мясцовым цэнтры занятасцi зараз знаходзiцца 776 чалавек, з iх у Белаазёрску — 161, сярод якiх 100 чалавек — жанчыны. Бярозаўская ГРЭС (месцiцца ў Белаазёрску), энергамеханiчны завод, «БелKELME» — асноўныя прадпрыемствы горада — маюць яскрава выражаную мужчынскую скiраванасць, вельмi востра адчуваецца недахоп жаночых вакансiй.

У раёне пражывае прыкладна 71 тысяча чалавек. З iх большую частку складаюць гараджане (Бяроза — 30 тысяч чалавек, Белаазёрск — 13,1 тысячы). Цэнтр занятасцi для працаўладкавання прапануе каля 80 вакансiй. Для панiжэння сацыяльнай напружанасцi ў раёне распрацавана адпаведная дзяржпраграма занятасцi насельнiцтва на гэты год. За кошт усiх крынiц фiнансавання на працягу года будзе створана 821 новае працоўнае месца, з iх 150 — у Белаазёрску.

— Практычна ўсе праблемы, з якiмi прыходзяць да нас грамадзяне, вырашаюцца на ўзроўнi райвыканкама i ва ўстаноўленыя законам тэрмiны, — адзначыла Вольга Аляксееўна. — Аднак трапляюцца i такiя звароты, вырашэнне якiх патрабуе дадатковага часу. Гэта рамонт жылля, будаўнiцтва вода- i газаправодаў з долевым удзелам бюджэтных сродкаў, добраўпарадкаванне дваровых тэрыторый, рамонт дарог i iнш.

Сярод iншых пытанняў, вырашэнне якiя патрабуе часу, Вольга Аляксееўна назвала зварот жыхароў вёскi Бронная Гара з нагоды незадавальняючага стану водаправода, што забяспечвае больш чым 1000 чалавек пiтной вадой. Ён даўно вычарпаў свой рэсурс, старая свiдравiна прыйшла ў непрыгоднасць. У мiнулым годзе вёска перажыла некалькi аварыйных спыненняў падачы вады. Рамантаваць водаправод нерэнтабельна — значна танней пабудаваць новы i прабурыць свiдравiну. Пад гэта з фонду аховы прыроды на 2006 год прадугледжана выдзелiць 123 мiльёны рублёў. Зараз распрацоўваецца праектная дакументацыя, да канца года вёска павiнна атрымаць новы водаправод.

У 2005 годзе 90 працэнтаў усiх зваротаў грамадзян паступiла ў райвыканкам у выглядзе пiсьмовых заяў. З 79 скаргаў неабгрунтаванымi аказалася больш за палову — 54. Яны датычылiся ў асноўным перагляду ўзроўню пенсiй, змянення сiстэмы ацяплення, прадастаўлення жылля сацыяльнага карыстання. «Самае хвалюючае пытанне для нашых грамадзян — жыллёвае, — тлумачыла кiраўнiк справамi раёна. — У раённай газеце пастаянна друкуецца iнфармацыя аб парадку фiнансавання будаўнiцтва жылля, аб фармiраваннi жыллёва-будаўнiчага кааператыва, але людзi часцей звяртаюцца за сацыяльным жыллём».

Раённыя ўлады надаюць пiльную ўвагу праблемам грамадзян. Па вынiках зваротаў жыхароў у раёне за мiнулы год было ўведзена ў эксплуатацыю 24,8 кiламетра вулiчнага газаправода, падведзены прыродны газ у 279 жылых памяшканняў. У Бярозе i Белаазёрску завершаны капiтальны рамонт 5 жылых дамоў на 198 кватэр, добраўпарадкаваны 4 дваровыя тэрыторыi. У Белаазёрску арганiзаваны рух двух гарадскiх аўтобусаў з падаўжэннем iх маршруту да вёскi Пяскi (што ў 2 кiламетрах ад горада), уведзена 9 прыгарадных пасажырскiх рэйсаў, зменены час i маршруты следавання 11 рэйсаў прыгарадных аўтобусаў для большага ахопу населеных пунктаў. Па просьбе жыхароў вёсак Лясiчыцы, Хрысо, Вайцешын аддзел адукацыi набыў аўтобус для падвозу дзяцей. У Бярозе наладжана праца кацельнi па вулiцы Майстроў, у Белаазёрску пачаты работы па электрыфiкацыi мiкрараёна № 7, лiквiдаваны недахопы ў будаўнiцтве жылля ў вёсках Светач, Сасноўка, Нарутавiчы i iнш.