Асаблiвасцi менталiтэту i... клiмату

Источник материала:

Погляд

Вось i да Дня жанчын Кангрэс ЗША падкiнуў чарговую пагрозу не прызнаць вынiкi прэзiдэнцкiх выбараў. Крыху блiжэй, у Еўрапарламенце, загадзя, да правядзення самога галасавання i абвяшчэння яго вынiкаў, складаюцца спiсы «невыязных» беларускiх чыноўнiкаў, сiлавiкоў i... журналiстаў. Вось вам i свабода слова! Вiдаць, найдэмакратычныя еўрапарламентарыi адмаўляюць «цёмным» беларусам у канстытуцыйным праве выказваць свае думкi, калi яны раптам не супадаюць з генеральнай лiнiяй дэмакратызатараў.

Зразумела i жаданне новых еўрапейцаў — палякаў i прыбалтаў — спадабацца магутным i заможным гаспадарам... Шчыра кажучы, я б здзiвiўся, каб ва ўсiм гэтым шабашы не ўзялi ўдзел аматары тонкiх кветкавых араматаў з больш чым далёкай ад Беларусi Грузii. Прама амерыканскi маштаб у iмкненнi навесцi ўласны парадак на ўсёй планеце! Што ж, з кiм павядзешся... Дык вось, з беспардоннасцю снежнай лавiны асобныя гарачыя горцы вырашылi зрабiць ласку беларускаму народу — узяць удзел у назiраннi за выбарамi. МЗС Грузii з гэтай нагоды звярнулася да кiраўнiка мiсii назiральнiкаў ад СНД Уладзiмiра Рушайлы з прапановай уключыць у склад мiсii 26 сваiх прадстаўнiкоў. Усё б нiчога, калi б не адразу два «але». Па-першае, 9 сакавiка Выканкам СНД накiраваў ноту ў адказ з паведамленнем пра спыненне падачы дакументаў на акрэдытацыю назiральнiкаў ад СНД i заадно нагадаў пра фактычнае ўхiленне Грузii ад пералiчэння ўзносаў, як у адзiны бюджэт СНД, так i на арганiзацыйна-тэхнiчныя мерапрыемствы па ажыццяўленню назiрання за выбарамi i рэферэндумамi ў Садружнасцi... А па-другое, як высветлiлася пазней, у спiсе кандыдатаў, прапанаваных афiцыйным Тбiлiсi, значылiся «знаёмыя ўсё твары». Прычым, вядомыя далёка не братнiмi пачуццямi да нашай краiны, а прама-такi любоўю да каляровых рэвалюцый, маючыя «карысны вопыт назiрання» за прэзiдэнцкiмi выбарамi ва Украiне i гатовыя iм творча скарыстацца. Узяць хоць бы тых жа лiдара экстрэмiсцкай арганiзацыi «Кмара» Георгiя Бакерыя, старшыню камiтэта па абароне i бяспецы парламента Грузii Георгiя Таргамадзэ, члена парламента Грузii Каха Гецадзэ...

Самi ж выдатна ведаюць стаўленне славян да няклiканых гасцей. Аднак, нягледзячы на адмову Выканкама СНД, гэтыя i iншыя асобы заяўляюць пра намер самастойна, у тым лiку канспiратыўна трапiць на тэрыторыю Беларусi. Натуральна, пра неаднаразовыя заявы прадстаўнiкоў беларускiх улад аб магчымай дэпартацыi iншаземцаў, якiя могуць прыбыць у краiну «для дэстабiлiзацыi абстаноўкi» ў перыяд прэзiдэнцкiх выбараў, грузiнскiя ваяжоры таксама добра дасведчаны. А калi так, выдатна разумеюць, што большае, на што iм варта разлiчваць — скандал на беларускай мяжы. Магчыма, для такога спектакля з удзелам заходнiх СМI i ўвесь сыр-бор.

Нагадаем, што раней прэс-сакратар беларускага МЗС Андрэй Папоў расказаў пра нейкую групу грамадзян Грузii, якая прыбудзе ў Беларусь пад выглядам назiральнiкаў, а на самай справе рыхтуе правядзенне правакацый. Паводле яго слоў, спецслужбы краiны маюць намер прыняць «вычарпальныя меры» для недапушчэння любога ўмяшання з-за мяжы.

Усё ж не варта забываць, што Беларусь — далёка не Грузiя. Клiмат тут больш суровы. У тым лiку i для аматараў рэвалюцыйных руж.