Незвычайны выгляд парэчак

Источник материала:

Рубрыку вядзе Ірына Самулевіч, тэл. 287-18-74

Калi вырошчваць чырвоныя парэчкi дрэўцам, ёсць магчымасць атрымаць не толькi добры ўраджай чыстых, здаровых ягад, але i выкарыстоўваць такiя пасадкi ў дэкаратыўных мэтах уздоўж дарожак i праездаў. Дрэўцы нагадваюць мiнiяцюрную яблыню. Вельмi прыгожа выглядаюць такiя дрэвы, калi яны ўсыпаныя чырвонымi ягадамi.

Каб атрымаць саджанцы дрэўцаў парэчак, спатрэбiцца здаровы, добра развiты 3—4-гадовы куст чырвоных парэчак, у якога за год да гэтага ўсе самыя магутныя парасткi былi папасынкаваныя. Гэты куст восенню пасля лiстападу ў дзень, спрыяльны для пасадкi, трэба акуратна выкапаць з камяком зямлi. Потым апусцiць каранi ў ваду i абмыць зямлю, злёгку патрэсваючы. Тады застанецца цэлай максiмальная колькасць дробных каранёў. Пасля гэтага трэба абрэзаць усе слабыя, нявыспеўшыя, крывыя парасткi, пакiнуць 3—5 самых доўгiх, моцных i роўных. Яны i стануць потым саджанцамi.

Наступны этап — найбольш складаны. Гэта дзяленне. Куст трэба падзялiць так, каб у кожнага парастка абавязкова была свая каранёвая сiстэма. Дзяленне праводзiць вострым нажом з нержавеючай сталi. Месца разрэзу каранёў апрацаваць 3-працэнтным растворам меднага купарвасу. Потым каранi неабходна абмакнуць у сумесь глiны i каравяку (1:1).

Пры выбары месца для пасадкi не трэба забываць, што чырвоныя парэчкi лепш растуць на нейтральнай цi злёгку кiслай глебе. Пасадку трэба праводзiць у той жа дзень з iнтэрвалам памiж саджанцамi ў 1,5 м. Выкопваць ямы i рыхтаваць глебу для пасадкi — як для звычайных парэчак. Побач з пасаджаным саджанцам неабходна абавязкова ўбiць рэйку для падвязкi. Гэта рэйка будзе служыць 2—3 гады, пакуль у саджанца не ўтворыцца надзейная каранёвая сiстэма.

У першы год закладваюць аснову будучай кроны, пакiнуўшы 3—5 (у залежнасцi ад гатунку) бакавых парасткаў. У першыя 1—2 гады крона фармiруецца так, як крона яблынi. У астатнiм догляд, як за звычайнымi чырвонымi парэчкамi. Вось толькi ў маi i пачатку лiпеня трэба будзе цалкам выразаць маладыя каранёвыя парасткi.