Парламентарыi заслухалi адказы ўрада

Источник материала:

Выкананы 13 з 16 асноўных паказчыкаў

Як адзначыў намеснiк прэм’ер-мiнiстра Iван Бамбiза, «у сацыяльна-эканамiчным развiццi Беларусi ў студзенi—кастрычнiку гэтага года захавана станоўчая дынамiка вытворчай i iнвестыцыйнай дзейнасцi ў ключавых галiнах эканомiкi, што дазволiла забяспечыць дасягненне 13 з 16 важнейшых параметраў прагнозу сацыяльна-эканамiчнага развiцця на 2006 год». У прыватнасцi, па большасцi важнейшых параметраў выкананне склалася нават на большым узроўнi ў параўнаннi з гадавым прагнозам. Разам з тым не ўдалося выйсцi на прагнозныя паказчыкi па энергаёмiстасцi валавога ўнутранага прадукту... Павелiчэнне ж ВУП за 10 месяцаў гэтага года склала 109,7 працэнта да адпаведнага перыяду мiнулага года.

У сельскай гаспадарцы без прыбытку па трох пазiцыях

Паводле слоў I. Бамбiзы, беспрыбытковай застаецца вытворчасць сельскагаспадарчай прадукцыi па трох пазiцыях. Так, гэта вытворчасць лёну, малака i мяса ялавiчыны. Пры гэтым ён адзначыў, што фiнансавая падтрымка сельскагаспадарчай вытворчасцi застаецца iстотнай, бо «без яе падняць сельскую гаспадарку немагчыма». Таму, паводле слоў намеснiка прэм’ер-мiнiстра, «не трэба лiчыць, што толькi мы падтрымлiваем сельскую гаспадарку. Гэта робяць усе краiны свету. Таксама як i падтрымлiваюць нацыянальны экспарт. А таму i мы прымаем рашэннi па мадэрнiзацыi нашых прадпрыемстваў, вытворчасцяў па мiжнародных стандартах».

Каму гарантавана службовае жыллё?

Як адзначыла дэпутат Людмiла Анiкеева, павiнен быць створаны новы пералiк асоб, якiм будзе прадастаўляцца службовае памяшканне. Тым не менш, да цяперашняга часу такi пералiк не зацверджаны. Як адзначыў мiнiстр жыллёва-камунальнай гаспадаркi Уладзiмiр Белахвостаў, ранейшыя пералiкi, якiя зацвярджалiся пастановамi Савета Мiнiстраў, страцiлi сваю моц. Падрыхтаваны новыя прапановы, якiя ўжо неаднаразова абмяркоўвалiся, у тым лiку i на ўзроўнi Прэзiдэнта. У вынiку вырашылi мэтазгодным забяспечваць службовым жыллём маладых спецыялiстаў, якiя накiраваны на працу па размеркаванню, а таксама тых, хто пераязджае з iншай мясцовасцi па прапанове, кантракту або запрашэнню вышэйстаячай арганiзацыi. Усе iншыя пералiкi, адзначыў У. Белахвостаў, якiх было больш за 800 толькi ў жыллёвай гаспадарцы, было прызнана мэтазгодным не перазацвярджаць, а выдзяленне службовага жылля праводзiць са строгай праверкай i абгрунтаваннем выключна рашэннем Савета Мiнiстраў. Такi парадак будзе ўведзены пасля падпiсання адпаведнага ўказа Прэзiдэнта.

Перапланаваць кватэру стане лягчэй

Дэпутат Галiна Мазуркевiч пацiкавiлася ў мiнiстра архiтэктуры i будаўнiцтва Аляксандра Селязнёва, калi будзе зацверджаны новы парадак перапланiроўкi кватэр. Паводле яе слоў, «нашы людзi сёння заслугоўваюць, каб уладкоўваць у iндывiдуальным парадку сваё жылое памяшканне пад сябе, з улiкам сваiх iнтарэсаў». Як адзначыў А. Селязнёў, падрыхтаваны дакумент, у адпаведнасцi з якiм прадугледжваецца магчымасць перапланiроўкi без вялiкiх узгадненняў i без праектна-каштарыснай дакументацыi там, дзе не закранаюцца нясучыя канструкцыi i тыя памяшканнi, што маюць сваю спецыфiку, — санвузлы i кухнi. Астатняе ўсё, паводле яго слоў, «спросцiцца па максiмуму».

Заробкi выкладчыкаў ВНУ iстотна павялiчаць?

Дэпутат Вольга Абрамава папрасiла адмянiць папраўку ў законапраект, згодна з якой выкладчыкi ВНУ змогуць шукаць дадатковыя вiды працы толькi са згоды асноўнага наймальнiка — рэктара. Паводле слоў, «людзi павiнны мець магчымасць працаваць столькi, колькi яны могуць i лiчаць неабходным, бо мы ж iмкнёмся да павышэння дабрабыту людзей». Аднак з падобнай думкай А. Радзькоў не пагадзiўся: «Для вышэйшай школы вызначальным звяном з’яўляецца навуковая школа. Калi няма класнай навуковай школы — няма ВНУ. Для таго, каб сфармiраваць навуковую школу, патрэбна мець свае ўласныя вынiкi даследаванняў, а таксама вучняў, аспiрантаў. Неабходна факусiраваць вакол сябе падобную абстаноўку. Калi ж прафесар ВНУ пачынае зарабляць там i там, то гэта не будзе садзейнiчаць нi той ВНУ, дзе ён працуе, нi той, дзе ён падпрацоўвае». У якасцi кампенсацыi, паведамiў А. Радзькоў, рыхтуюцца прапановы «па iстотнаму павелiчэнню заробкаў асноўным выкладчыкам ВНУ».