Вольга АБРАМАВА: «На асобных напрамках адносiны з Расiяй могуць змянiцца не ў горшы бок»

Источник материала:

Меркаванне

— Цi не лiчыце вы, што арганiзатары «Маршаў нязгодных» рыхтуюцца да спробы «каляровай» рэвалюцыi ў Расii? Якiя шанцы, на ваш погляд, мае такое развiццё падзей?

— На мой погляд, шанцаў на ўзяцце такiм чынам улады ў Расii няма нiякiх. Нiводнага шанца! Для таго, каб такiм чынам узяць уладу, яна павiнна «ляжаць пад нагамi». Павiнна быць слабая, неадмабiлiзаваная ўлада, не гатовая аказваць супрацiў нi на адным напрамку. У Расii сёння гэтага няма.

А тое, што мы бачым арыентацыю не на працу ў «сiстэмнай» апазiцыi, не на тое, каб легальным чынам прабiвацца ў органы ўлады, то гэта сапраўды так. Сам спосаб дзеянняў гаворыць пра тое, што абсалютная большасць арганiзацый, якiя ўваходзяць туды, з’яўляюцца маргiналiзаванымi арганiзацыямi.

— Цi магчыма, што расiйская партыя «Яблык» i буйная лiберальная партыя «Саюз правых сiл» пяройдуць да «несiстэмных» метадаў барацьбы?

— Немагчымага нiчога няма. Тым больш, што элементы такiх дзеянняў былi характэрныя для расiйскага «Яблыка» пасля 2003 года, пасля таго, як партыя апынулася па-за парламенцкiмi сценамi. Ва ўсякiм разе, у асобных рэгiёнах, у буйных прамысловых цэнтрах прадстаўнiкi (асаблiва маладзёжных структур) «Яблыка» паводзiлi сябе «несiстэмным» чынам. Праўда, не так радыкальна, як «Iншая Расiя»...

А многiя правыя палiтыкi, напрыклад, Iрына Хакамада, удзельнiчалi ў «Маршы нязгодных». Канешне, Iрына Хакамада — не той палiтык, якi будзе правакаваць сваiх прыхiльнiкаў «будаваць барыкады». Вулiчныя пратэстныя акцыi таксама могуць праходзiць у прававым полi.

У цэлым жа для правых «вулiчны» стыль нехарактэрны. I для сацыял-лiбералаў, да якiх я адношу расiйскую партыю «Яблык», гэта нетыповыя паводзiны. Дарэчы, у апошнiя гады расiйскi «Яблык» пераўтварыўся больш у праваабарончую арганiзацыю. Бо нiчога iншага расiйская дзяржава партыi не пакiнула.

— Як могуць змянiцца адносiны з Расiяй пасля прэзiдэнцкiх выбараў у Расii ў 2008 годзе, калi пры ўладзе застанецца чалавек з каманды Пуцiна, а сам Уладзiмiр Пуцiн сыдзе з паста кiраўнiка краiны?

— На асобных напрамках адносiны могуць змянiцца не ў горшы бок. У бок змякчэння некаторых часовых прэтэнзiй. Але ў цэлым адносiны задаюцца не толькi рамкавымi ўмовамi двухбаковых пагадненняў, але i тымi пагадненнямi, да якiх зараз тая цi iншая краiна мяркуе далучыцца. Для Расii гэта ўступленне ў СГА.

— З’явiлася iнфармацыя, што Расiя ўвязвае выдзяленне стабiлiзацыйнага крэдыту ў памеры 1,5 млрд долараў для Беларусi з прадастаўленнем акцый «Белтрансгазу» ў залог. Як вы ацэньваеце такую пазiцыю расiйскага ўрада?

— Гэта ўкладваецца ў рынкавыя адносiны памiж партнёрамi. Калi адзiн бок нешта просiць у iншага, гэты iншы мае права высоўваць патрабаваннi, якiя лiчыць патрэбнымi. А далей ужо, як дамовяцца...