«Уладар вёскi»: ад сяўбы i да жнiва

Источник материала:

Паводле слоў дырэктара маладзёжнага цэнтра Марыны Гараповiч, у праекце змогуць прыняць удзел любыя сем’i, дзе выхоўваюцца дзецi да 18 гадоў. Узрост самiх бацькоў значэння не мае. Кожная сям’я па сутнасцi будзе асобнай мiнi-камандай, якой трэба прайсцi праз 18 этапаў гульнi.

— Напачатку мы задумалi праект выключна для гарадскiх сем’яў. Планавалi, што падчас гульнi найперш гараджанам давядзецца або аднаўляць некалi атрыманыя навыкi сельскагаспадарчай працы, або ўпершыню ў жыццi вучыцца iм: араць, сеяць, даiць карову i г.д. За працай такiя сем’i, акрамя спаборнiцтва, павiнны былi ўмацаваць свае сяброўскiя адносiны, — расказвае Марына Гараповiч. — Аднак сваю нязгоду i нават крыўду з такiмi ўмовамi правядзення гульнi выказала вясковая моладзь, маўляў, чаму вы ўжо каторы свой праект арыентуеце найперш на гарадскiх жыхароў? Таму кола ўдзельнiкаў вырашана было пашырыць i цяпер галоўнай мэтай праекта, напэўна, можна лiчыць умацаванне сяброўскiх стасункаў памiж сем’ямi з вёскi i горада. Прынамсi, свой намер паўдзельнiчаць у праекце выказалi ўжо дзве сям’i з сельскай мясцовасцi, але набор удзельнiкаў, у тым лiку i гараджан, працягваецца.

Стартаваць праект павiнен у канцы красавiка—пачатку мая, завершыцца — блiжэй да восенi, з пачаткам жнiва. Кожны этап гульнi будзе праходзiць у асобным сельскагаспадарчым прадпрыемстве або аграгарадку. На месцах будзе арганiзавана неабходная падтрымка для правядзення таго цi iншага этапу, у тым лiку судзейства i ўзнагароджвання пераможцаў.