Паважаныя сябры!

Источник материала:

Сёлетнi фестываль у Мiры, што месцiцца ў сэрцы Гродзеншчыны, заклiканы прыцягнуць увагу да музычных скарбаў Гродзенскага краю, якiя назапашвалiся на працягу многiх стагоддзяў i прадстаўленыя не толькi багацейшым фальклорам, але i прафесiйным музычным мастацтвам.

Феерычныя канцэрты ў залах i на пленэры, з уласцiвым для iх высокiм напалам, спалучаюцца з iнтэлектуальнай засяроджанасцю навуковай канферэнцыi, а святкаванне 125-годдзя славутых песняроў беларускай зямлi Янкi Купалы i Якуба Коласа — з «музычным падарункам» былым мецэнатам Мiрскай зямлi — Радзiвiлам, i нарэшце — з джазавым канцэртам.

Вы адчуеце незвычайную асалоду ад прэм’еры новай праграмы камерных калектываў Нацыянальнага канцэртнага аркестра Беларусi «Знакамiтыя iмёны Беларусi» Мацей Радзiвiл (1751—1821), Антонiй Радзiвiл (1775—1833), унiкальнага канцэрта «Дыялог супрацьлегласцяў-2» з удзелам бiг-бэнда Нацыянальнага канцэртнага аркестра Беларусi i Нацыянальнага акадэмiчнага народнага хору Рэспублiкi Беларусь iмя Г. Цiтовiча. Адметная старонка фестывалю — гала-канцэрт калектываў i выканаўцаў Гродзенскай абласной фiлармонii «Песняры беларускай душы». У першы дзень мастацкiя калектывы Карэлiцкага раёна пакажуць сваё майстэрства ў пасялковым амфiтэатры. Назаўтра традыцыйныя для рэгiёна песнi i танцы перабяруцца блiжэй да замка, каб арганiчна ўпiсацца ў сярэдневяковы турнiр i горад майстроў.

Мiрскiя навуковыя чытаннi «Архiтэктурная спадчына Беларусi — канстанта памяцi» дапамогуць адчуць подых старажытнага дойлiдства.

Сучасны пасёлак сустрэне вас фотавыстаўкай народнага фотаклуба «Гродна» «Мiрскi замак — крынiца натхнення», шматлiкiмi атракцыёнамi.

Пачатак у 11:00.

Запрашаем вас на свята!

Арганiзацыйны камiтэт.