«Фальшывы шлюб»

Источник материала:

Усё адбылося дакладна як у прымаўцы: без мяне мяне ажанiлi. Мацi вельмi хацела, каб дачка, якая жыла з хлопцам у грамадзянскiм шлюбе, па-сапраўднаму выйшла замуж. Тым больш што ў маладых нарадзiлася дзiця. Вось толькi «зяць» не хацеў афiцыйна афармляць адносiны. I тады мацi, якая працавала сакратаром сельскага Савета, разам з дачкой вырашыла зарэгiстраваць шлюб... без удзелу жанiха. Нявеста напiсала адпаведную заяву, падрабiла подпiсы, узяла «напракат» пашпарт жанiха, i мацi аформiла шлюб. Уладальнiк пашпарта толькi праз паўтара месяца выпадкова заўважыў, што яго ажанiлi, i звярнуўся ў суд з патрабаваннем скасаваць патаемны шлюб. Суд, вядома ж, задаволiў гэты iск. Маладыя людзi разышлiся як у моры караблi. Мацi, якая так хацела шчасця для дачкi, пазбавiлася працы. Але на гэтым кур’ёзная гiсторыя не скончылася. Нядаўна яна атрымала яшчэ больш непрыемны для шлюбных аферыстак працяг. Пракуратура Лоеўскага раёна, на тэрыторыi якога i адбылася гэтая падзея, узбудзiла супраць мацi i дачкi крымiнальную справу.

Як паведамiў у тэлефоннай размове з аглядальнiкам «Звязды» следчы пракуратуры Аляксандр Трафiменка, экс-сакратар сельсавета абвiнавачваецца ў злоўжываннi службовымi паўнамоцтвамi, здзейсненымi з асабiстай зацiкаўленасцi. Яе дачка праходзiць па справе як памагатая. Паводле слоў следчага, ахвяра аферыстак не прад’яўляе зараз нiякiх прэтэнзiй нi былой каханай, нi колiшняй «цешчы». Тым не менш «палюбоўна» вырашыць кур’ёзны канфлiкт наўрад цi ўдасца — справа будзе перададзена ў суд.