Вышэй «планка» — большы попыт?

Источник материала:

З моманту ўвядзення сiстэмы адраснай сацыяльнай дапамогi ў 2001 годзе яе атрымалi амаль паўмiльёна чалавек i ў асноўным — з няпоўных i шматдзетных сем’яў. Пры гэтым самi ўмовы прадастаўлення адраснай падтрымкi змянялiся. Так, нагадала Таццяна Касцюковiч, зараз «планка» дапамогi вызначана ў 60 працэнтаў бюджэту пражытковага мiнiмуму, што складае на сёння 107 460 рублёў. А само права на адрасную падтрымку даецца не толькi пэўным сацыяльна «слабым» катэгорыям, а па сутнасцi ўсiм, у тым лiку працаздольным грамадзянам, якiя па аб’ектыўных прычынах не могуць забяспечыць сабе варты ўзровень даходаў. Апроч таго, з 2005 года ў выключных выпадках з’явiлася магчымасць аказваць такую падтрымку не толькi штомесячна, але i аднаразова. Дарэчы, памер аднаразовых выплат можа вагацца ад 50 да 500 працэнтаў БПМ.

Праўда, заўважыла Таццяна Касцюковiч, апошнiм часам даводзiцца канстатаваць паступовае змяншэнне колькасцi атрымальнiкаў адраснай сацыяльнай дапамогi. Асноўнай прычынай гэтага стаў паступовы рост даходаў: калi ў 2000 годзе за рысай малазабяспечанасцi знаходзiлася 42 працэнты грамадзян краiны, то летась — ужо каля 11 працэнтаў. Такiм чынам, фактычна адраснай падтрымкай зараз карыстаецца толькi 4,7 працэнта ад колькасцi маламаёмных грамадзян, або 0,6 працэнта ад усяго насельнiцтва Беларусi. Да таго ж аказваецца невысокiм i сам памер выплат — у сярэднiм ён складае каля 28 тыс. рублёў на аднаго чалавека.

Мiж тым, адзначыла Таццяна Касцюковiч, сродкi, што вызваляцца ў вынiку прыняцця рашэння аб упарадкаваннi сацыяльных iльгот i гарантый, дазволяць зрабiць адрасную сацыяльную дапамогу больш важнай. У прыватнасцi, плануецца, што з наступнага года планка штомесячных адрасных даплат узрасце да 80 працэнтаў бюджэту пражытковага мiнiмуму. А права на аднаразовыя сацыяльныя дапамогi атрымаюць малазабяспечаныя грамадзяне з даходамi менш за БПМ. Да слова, зазначыла Таццяна Касцюковiч, павелiчэнне паказчыку даплат павiнна прывесцi да росту колькасцi атрымальнiкаў адраснай сацыяльнай дапамогi — чакаецца, што ў наступным годзе могуць прадаставiць прыкладна 170 тысячам чалавек.