Горкiя ўрокi для п’яных кiроўцаў

Источник материала:

Паводле звестак Генеральнай пракуратуры, за 5 месяцаў гэтага года зарэгiстравана 68 крымiнальных спраў, узбуджаных супраць вадзiцеляў, якiя сёлета паўторна затрымлiвалiся за кiраванне транспартным сродкам у стане алкагольнага ап’янення. Прычым ёсць гора-кiроўцы, якiя iмгненна забываюць пра штрафныя санкцыi i паўтараюць свой «п’яны подзвiг». Напрыклад, адзiн сталiчны жыхар, якога супрацоўнiкi ДАI затрымалi за кiраванне аўтамабiлем у нецвярозым стане, ужо праз 4 днi пасля вынясення судом рашэння аб адмiнiстрацыйным пакараннi, зноў здзейснiў аналагiчнае правапарушэнне. На гэты раз супраць няўмольнага прыхiльнiка Бахуса была ўзбуджана крымiнальная справа. Суд Заводскага раёна Мiнска прыгаварыў злоснага парушальнiка да 2 гадоў папраўчых работ i пазбавiў права кiравання транспартнымi сродкамi на 5 гадоў.

Не ўдалося пазбегнуць суровага пакарання яшчэ аднаму такому аматару ездзiць за рулём аўтамабiля ў п’яным выглядзе. Хоць напачатку суд Фрунзенскага раёна сталiцы толькi аштрафаваў выпiвоху за кiраванне аўтамабiлем у нецвярозым стане. Аднак пракуратура выправiла памылку. Як высветлiлася, гэты грамадзянiн месяц таму ўжо прыцягваўся да адмiнiстрацыйнай адказнасцi за падобнае правапарушэнне: пазбавiўся вадзiцельскага пасведчання на 2 гады i заплацiў штраф у памеры 775 тысяч рублёў. Аднак урок не пайшоў на карысць. «Бяспраўны» вадзiцель, напэўна, вырашыў, што яму ўжо няма чаго губляць i зноў сеў за руль нападпiтку. Неўзабаве яму давядзецца зноў адказваць за сваё «п’янае свавольства», але ўжо згодна з артыкулам Крымiнальнага кодэкса. I ўсё ж пагроза крымiнальнага пакарання не палохае аматараў «п’янага драйву». Як паведамiлi ва ўпраўленнi Дзяржаўтаiнспекцыi МУС краiны, толькi за мiнулыя выхадныя i святочны дзень былi затрыманы 910 п’яных вадзiцеляў. Па вiне такiх кiроўцаў, мiж iншым, адбылося 9 дарожна-транспартных здарэнняў.