БЧ павiнна актывiзаваць iнавацыйную дзейнасць

Источник материала:

Тэмпы iнавацыйнага развiцця Беларускай чыгункi неабходна паскорыць, заявiў сёння прэм’ер-мiнiстр Беларусi Сяргей Сiдорскi на нарадзе ва ўпраўленнi БЧ у Мiнску.

Паводле яго слоў, трэба больш дынамiчна нарошчваць экспартны патэнцыял чыгункi, паскорыць працэс абнаўлення яе рухомага саставу, удасканальваць сiстэму кiравання перавозкамi. "Беларусь выбрала iнавацыйны шлях развiцця. Беларуская чыгунка павiнна развiвацца не толькi за кошт нарошчвання экспартнага патэнцыялу, але таксама за кошт стварэння сучасных iнавацыйных вытворчасцяў", — сказаў прэм’ер-мiнiстр. Сяргей Сiдорскi адзначыў, што ступень зносу рухомага саставу БЧ складае 72 працэнты. "У мiнулым годзе парк чыгункi абнавiўся ўсяго на 1,46 працэнта, аднак гэтага недастаткова", — заявiў ён. "Многiя краiны маюць патрэбнасць у грузавых вагонах i гатовы набываць iх у нас, — сказаў прэм’ер-мiнiстр. — Сярод нашых патэнцыяльных партнёраў — прадпрыемствы Расii i Казахстана". Асiповiцкi вагонабудаўнiчы завод, якi ствараецца сумесна з расiйскiм ЗАТ "Гранд-экспрэс", можа стаць буйным экспарцёрам танкаў-кантэйнераў i грузавых вагонаў. Паводле яго слоў, многiя iнавацыйныя праекты, якiя прапануюцца БЧ, — доўгатэрмiновыя. "Ва ўмовах развiцця ў краiне iнавацыйнай эканомiкi прыярытэт неабходна аддаваць кароткатэрмiновым праектам, якiя на працягу 1—2 гадоў дадуць высокi эканамiчны эфект", — дадаў прэм’ер-мiнiстр.

БЕЛТА.