Цёплае летняе надвор’е

Источник материала:

На працягу гэтага тыдня ў Беларусі ўсталюецца даволi цёплае надвор’е, паведамiў рэдакцыi начальнiк службы гiдраметэапрагнозаў Рэспублiканскага гiдраметцэнтра Дзмiтрый Рабаў.

Да пятнiцы тэрыторыя краiны будзе знаходзiцца ў зоне павышанага цiску, толькi ў аўторак i сераду праз усходнi рэгiён будзе рухацца атмасферны фронт, якi выклiча там кароткачасовыя дажджы. У чацвер ападкаў увогуле не будзе. Тэмпература паветра ўначы 7—14, удзень — 16—23 цяпла. Пачынаючы з пятнiцы, на тэрыторыю краiны пачнуць рухацца больш цёплыя i вiльготныя паветраныя масы з боку Заходняй Еўропы. Таму ў пятнiцу i суботу па паўночным усходзе, а ў нядзелю ў асобных раёнах чакаюцца кароткачасовыя дажджы. Тэмпература паветра ў суботу ўначы 9—14, у нядзелю 10—15 градусаў, удзень у суботу 21—26 цяпла, па паўднёвым захадзе да плюс 28 градусаў, у нядзелю — 22—28 цяпла. Згодна з папярэднiмi прагнозамi, у першай палове чэрвеня тэмпература паветра ўначы будзе складаць 4—12, удзень 16—24 цяпла, у асобныя днi — да плюс 25—28 градусаў, месцамi пройдуць кароткачасовыя дажджы.

Сяргей КУРКАЧ.