Школьная форма бізнэс-класа з кiшэняй бяспекi

Источник материала:

На слыху 

ААТ "Славянка" вырабляе новыя школьныя касцюмы для хлопчыкаў бiзнэс-класа. Адзiн з элементаў — кiшэня, якая абараняе дзiця ад электрамагнiтнага выпраменьвання мабiльнага тэлефона.

Полiамiдная тканiна з металiзаванай нiткай — гэта колiшняя распрацоўка нямецкай армii. Бундэсвер распрацаваў яе для вайскоўцаў, а сёння вынаходнiцтва служыць мiрным мэтам.

Бабруйскiя швейнiкi, якiя сочаць за навiнкамi на сусветным рынку, вырашылi паклапацiцца пра здароўе школьнiкаў. Кiшэня для мабiльнага тэлефона, якая з аднаго боку зроблена са спецыяльнай тканiны, дазволiць дзiцяцi заставацца на сувязi, адначасова абаронiць арганiзм ад электрамагнiтнага выпраменьвання тэлефона. Яго ўздзеянне на чалавека да канца яшчэ не вывучана, але iнфармацыя пра шкоду час ад часу з’яўляецца, таму сродкi абароны, мяркуюць бацькi, усё ж нялiшнiя.

— Мы хочам, каб дзецi былi здаровыя, — сказаў дырэктар "Славянкi" Тэймураз Бачарышвiлi. — Кiшэня бяспекi павялiчвае кошт школьнай формы толькi на 5 тысяч рублёў.

Праўда, новы элемент пакуль з’явiўся толькi ў касцюмах для хлопчыкаў: мадэльеры яшчэ не вырашылi, дзе зрабiць кiшэню для мабiльнага тэлефона ў дзявочых камплектах, якiя паводле моды маюць прыталеныя сiлуэты i кароткiя спаднiцы.

Дарэчы, касцюм для хлопчыка бiзнэс-класа адрознiваецца ад падобных не толькi абаронай ад выпраменьвання мабiльнiка. Гэта ўвогуле паменшаны варыянт дарагога дзелавога строя для дарослага мужчыны. У iм выкарыстоўваюцца тканiны з натуральнай воўнай i вiскозай, спецыяльная тэхнiка пашыву. Сёння гэтыя касцюмы ёсць у продажы ва ўсiх буйных крамах Мiнска. Для падлетка школьная форма бiзнэс-класа абыдзецца прыкладна ў 125 тысяч рублёў, для малодшага школьнiка — да 100 тысяч.

Iлона Iванова.