Фотофакт. Центр Европы

Источник материала:

У Полацку на Дзень горада адкрылi памятны знак "Геаграфiчны цэнтр Эўропы". На 55 градусе 30 хвiлiне паўночнай шыраты i 28 градусе 48 хвiлiне ўсходняй даўгаты пабывала фотакарэспандэнтка "НН" Юлiя Дарашкевiч

Яшчэ нядаўна цэнтрам Эўропы беларусы лiчылi возера Шо, што на Глыбоччыне. Аднак айчынныя геадэзiсты ў чарговы раз пры дапамозе новых тэхналёгiй пералiчылi каардынаты, i сэрца Эўропы перамясьцiлася ў Полацк. Зараз пра гэта сьведчыць памятны знак, адкрыты ў межах сьвяткаваньня Дня горада ў мiнулыя выходныя.

Адразу ж зьявiлася i новая традыцыя - кiдаць на помнiк грошы. Манэтаў беларусы ня маюць, таму за лiчаныя хвiлiны цэнтр Эўропы быў завалены дробнымi купюрамi.

Сьвята горада распачалася з канцэрта клясычнай музыкi пад сьценамi Сафii. Пакуль з аднаго боку сабору сьпявалi арыi, зь iншага гандлявалi "Алiварыей".

Ва ўрачыстым шэсьцi па вулiцах Полацку прынялi ўдзел кiраўнiцтва горада (мэра Уладзiмiра Тачылу суправаджала калiсьцi беларуская сьпявачка Лiка Ялiнская, а зараз жонка расейскага кiлбаснага магната Анжалiка Агурбаш), вясельныя пары, перадавiкi вытворчасьцi i маладыя спецыялiсты.

Адзiн са сваiх старых гiтоў выканала для палачанаў Гюнеш. Беларуская сьпявачка канчаткова пазбавiлася сваiх азэрбаджанскiх каранёў - яшчэ раней перафарбавала, а зараз i абрэзала некалi шыкоўныя валасы (пагаворваюць, што менавiта з-за ўсходняга калярыту Гюнеш Абасава "праляцела" на Славянскiм базары i на адборах на Эўрабачаньне).

На цэнтральных вулiцах гораду працавалi народныя ўмельцы, а таксама кропкi з шашлыкамi.

Юлiя Дарашкевiч, "Наша Ніва"