Канстытуцыйны суд Беларусі надзелены дадатковымi паўнамоцтвамi

Источник материала:

Адпаведны дэкрэт № 14 "Аб некаторых мерах па ўдасканаленні дзейнасцi Канстытуцыйнага Суда Рэспублiкi Беларусь" кiраўнiк дзяржавы Аляксандр Лукашэнка выдаў 26 чэрвеня.

У прыватнасцi, КС будзе ажыццяўляць абавязковы папярэднi кантроль канстытуцыйнасцi ўсiх законаў, прынятых Палатай прадстаўнiкоў Нацыянальнага сходу Беларусi i адобраных Саветам Рэспублiкi, да падпiсання гэтых законаў Прэзiдэнтам.

Канстытуцыйны суд па прапанове Прэзiдэнта будзе выкладаць пазiцыю аб канстытуцыйнасцi мiжнародных дагавораў да падпiсання кiраўнiком дзяржавы адпаведных нарматыўных прававых актаў, а таксама аб дакументах, што прымаюцца (выдаюцца) замежнымi дзяржавамi, мiжнароднымi арганiзацыямi i (або) iх органамi i закранаюць iнтарэсы Рэспублiкi Беларусь, у частцы iх адпаведнасцi агульнапрызнаным прынцыпам i нормам мiжнароднага права (па прапановах Прэзiдэнта, Палаты прадстаўнiкоў i Савета Рэспублiкi Нацыянальнага сходу, Савета Мiнiстраў).

Па даручэннi кiраўнiка дзяржавы Канстытуцыйны суд упаўнаважаны таксама даваць афiцыйнае тлумачэнне дэкрэтаў i ўказаў, якiя датычацца канстытуцыйных правоў, свабод i абавязкаў грамадзян.

КС па прапанове Прэзiдыума Савета Рэспублiкi будзе прымаць рашэнне аб наяўнасцi фактаў сiстэматычнага або грубага парушэння мясцовым Саветам дэпутатаў патрабаванняў заканадаўства.

Акрамя таго, суддзi КС надзяляюцца правам па даручэннi Прэзiдэнта праводзiць праверку канстытуцыйнасцi вызначаных кiраўнiком дзяржавы напрамкаў нарматворчай дзейнасцi i правапрымяняльнай практыкi судоў, праваахоўных i iншых дзяржаўных органаў.

Дэкрэт уступае ў сiлу з дня яго афiцыйнага апублiкавання, з’яўляецца часовым i прадстаўляецца на разгляд Нацыянальнага сходу Рэспублiкi Беларусь.

Прэс-служба Прэзiдэнта Рэспублiкi Беларусь.