А на мой погляд...

Источник материала:

Мары пра адпачынак спраўджваюцца і... грэюць сваёй перспектывай

Лета наблiжаецца да свайго каляндарнага завяршэння, хоць па цяперашнiх умовах надвор’я гэтага, на радасць многiм, i не скажаш — i пазагараць яшчэ можна, i пакупацца. Словам, добра адпачыць нават пасля працоўнага дня цi ў выхадныя. Ну, а хто яшчэ цi ўжо ў водпуску цi толькi збiраецца, шанцаў i магчымасцяў на прыемнае баўленне часу маюць яшчэ больш. Зрэшты, многiя па аб’ектыўных цi суб’ектыўных прычынах плануюць свой адпачынак не толькi на лета.

Цi спраўдзiлiся вашы мары, планы пра добры водпуск, адпачынак сёлета? Цi ў вас яшчэ ўсё наперадзе? Што асабiста для вас азначае добра адпачыць, расслабiцца?

<І>Iрына Запольская, старшыня Бабаўнянскага сельскага Савета Капыльскага раёна:

— Ведаеце, я летам у водпуск не хаджу ўжо гадоў 20. Раней гэта было звязана са спецыфiкай маёй працы землеўпарадчыка. Апошнiя 6 гадоў, калi пачала працаваць старшынёй сельскага Савета, лета — таксама не лепшы час для ўласнага адпачынку: гарачая пара ў вёсцы, самi ведаеце... У водпуск я звычайна iду ў лiстападзе—снежнi. Сёлета таксама планую адпачыць у гэты час. Як? Я ўжо двойчы была ў санаторыi "Прыазёрны", спадабалася, лячэнне там вельмi добрае. Вось планую патрапiць у санаторый i сёлета.

Галiна Садоўская, начальнiк аддзела рознiчнага бiзнэсу фiлiяла № 422 ААТ "ААБ Беларусбанк" г. Слонiма:

— Не была я ў адпачынку сёлета, таму i мары мае не спраўдзiлiся. Не, сам водпуск быў, але я вучуся, таму i пайшоў ён на сесiю. Ды i дачка ўступала ў шлюб, таму ўвесь вольны час iшоў на падрыхтоўку да гэтай важнай i значнай для нас падзеi.

Вядома ж, я мару пра адпачынак — у наступным годзе (смяецца). Каб паляжаць, зняць стрэс...

Вiктар Дубарэнка, намеснiк дырэктара па якасцi Мiнскага домабудаўнiчага камбiната:

— Быў, усё споўнiлася, было вельмi добра! Мы з жонкай планавалi паехаць у Турцыю, i ўсё атрымалася. Было нават лепш, чым мы сабе ўяўлялi! Дарэчы, у Турцыi мы былi ўпершыню. Запомнiлiся экскурсii ў Памукале, старажытную крэпасць... Ды ўсё запомнiлася! Безумоўна (смяецца), пасля такой прыемнай вандроўкi, добрых уражанняў, зноў ёсць жаданне патрапiць у гэтую краiну.

Аляксандр Бельскi, майстар па кiнаабсталяваннi кiнастудыi "Беларусьфiльм":

— Задумкi i планы, вядома ж, былi, але, на жаль, яны не спраўдзiлiся: было шмат працы, трэба было завяршаць пачатае. У водпуск я планую пайсцi ў вераснi i правесцi яго вельмi актыўна — на ўласным падворку ў вёсцы. Кожны год я перакрываю чаротам дах нашай альтанкi — вось вам ужо занятак. Трэба зрабiць слупы для веснiчак з камянёў. Планую, нарэшце, зрабiць на ўчастку i фантан. Ну, i праца ў садзе, на агародзе.

Таццяна Логман, знаходзiцца ў водпуску па доглядзе дзiцяцi, вёска Слабада-Кучынка Капыльскага раёна:

— Нават i не ведаю, што вам адказаць... На лета мы нiчога не планавалi, бо муж працуе ў гаспадарцы: якi ў яго адпачынак у гэты час?! Уласная гаспадарка, дзiця малое... Зiмой, хiба, нейкi адпачынак будзе. Вось, скажам, плануем на час з’ездзiць у госцi да сваякоў, родных.

Аксана Сайко, эканамiст Лунiнецкага раённага спажывецкага таварыства:

— Водпуску не было, пойдзе ўвесь на сесiю. Вось якраз у вераснi пачнецца. Вучуся я на шостым курсе Палескага ўнiверсiтэта, так што няшмат мне засталося. А мары мае (смяецца), безумоўна, пра мора. Вось, можа, пасля заканчэння вучобы ў наступным годзе атрымаецца...

Ларыса Захарава, пенсiянерка, г. Маладзечна:

— Я ў душы — падарожнiца. Раней з дзецьмi, i без iх рэгулярна адпачываць у Крым ездзiлi, з калегамi па працы — на Нарач. Сёлета планавалi наведаць родных у Варонежы, але не атрымалася: рамантавалi дачу, ды i дажджы падарожжу не садзейнiчалi. Такi вось "працоўны адпачынак" атрымаўся (смяецца). Ды i ў нашым узросце ўжо больш пасiўны адпачынак, а не актыўны, падыходзiць. Вось мы любiм у лес выбiрацца. Дарэчы, сёлета пайшлi ў малiны, дык сустрэлi дзiка! Так спужалiся, як ён з шумам праiмчаў (смяецца). Вось вам i незабыўнае ўражанне пра адпачынак!

Сяргей СТАРЫНАЎ.