Неадкладная рэгістрацыя

Источник материала:

Паводле рашэння суда, яшчэ некаторыя прэтэндэнты на дэпутацкае крэсла атрымалi магчымасць уключыцца ў перадвыбарную гонку

Сушукальнiкi, нязгодныя з рашэннем ЦВК аб адмове ў рэгiстрацыi кандыдатамi ў дэпутаты, аспрэчваюць яго ў Вярхоўным Судзе. Туды паступiла 19 скаргаў, праўда, адну з iх забраў сам заяўнiк. Як паведамiлi ў Вярхоўным Судзе, колькасць скаргаў на адмову ў рэгiстрацыi кандыдатамi ў дэпутаты зменшылася ў разы, параўноўваючы з мiнулымi выбарамi. Днямi былi разгледжаны 15 такiх скаргаў, 2 з iх — задаволены, па трох рашэннi будуць прымацца сёння. Дарэчы, у адпаведнасцi з заканадаўствам гэта апошнi тэрмiн разгляду скаргаў.

Вярхоўны Суд задаволiў скаргi Аляксея Туровiча i Уладзiмiра Маркава. Выбаркамы адмовiлi iм у рэгiстрацыi па прычыне недакладнасцi звестак, прадстаўленых у дэкларацыi аб даходах i маёмасцi. Абодва прэтэндэнты не знялi з улiку аўтамабiлi, якiя ў свой час прадалi па даверанасцi. Напрыклад, Уладзiмiр Маркаў ледзь не пазбавiўся шанцу стаць кандыдатам у дэпутаты з-за таго, што не ўказаў у сваёй дэкларацыi "запарожац" 1982 года выпуску. Незадэклараваная прэтэндэнтамi маёмасць намiнальна лiчылася за iмi, хоць фактычна iм i не належала. У адпаведнасцi з рашэннем суда абодва прэтэндэнты яшчэ ўчора былi зарэгiстраваныя кандыдатамi ў дэпутаты. Так што Цэнтрвыбаркам тут спрацаваў вельмi аператыўна.

— З перадвыбарнай гонкi такiя кандыдаты не выпадуць, — запэўнiў сакратар ЦВК Мiкалай Лазавiк. — Рашэнне Вярхоўнага Суда з’яўляецца канчатковым i абскарджанню не падлягае. Таму як толькi атрымлiваем адпаведныя дакументы, мы неадкладна рэгiструем грамадзян, чые скаргi былi задаволеныя, кандыдатамi ў дэпутаты. Спадар Маркаў па 91-й выбарчай акрузе i спадар Туровiч па 102-й акрузе ўжо зарэгiстраваныя. Яны могуць звяртацца ў акруговыя выбарчыя камiсii, iм будуць выдзелены эфiрны час, сродкi на выраб друкаванай прадукцыi, яны могуць апублiкаваць свае перадвыбарныя праграмы ў газетах...

Чакаецца, што ў самы блiзкi час вызначыцца канчатковая колькасць прэтэндэнтаў на дэпутацкае крэсла. Аднак пакуль адны аспрэчваюць сваё права на дэпутацкi мандат, некаторыя палiтыкi, як сказаў Мiкалай Лазавiк, "заяўляюць пра тое, што здымуць свае кандыдатуры, i гэта iх права". Таму iнтрыга пакуль захоўваецца...