Бяжы, Іра, бяжы!

Источник материала:

У Гомелi прайшлi спаборнiцтвы па бегу на высокiх абцасах

Арганiзатарамi мерапрыемства выступiлi аддзел культуры Гомельскага гарвыканкама i гарадскi Цэнтр моды i прыгажосцi "Крыштальная нiмфа". Паводле ўмоў акцыi, да ўдзелу ў ёй дапускалiся дзяўчаты пасля 18 гадоў, i абавязкова — у туфлях з абцасамi не нiжэй за 7 см. 60-метровую дыстанцыю для спаборнiцтваў прызначылi ў Пiянерскiм скверы.

У апошнi момант, праўда, гарадскiя ўлады з меркаванняў бяспекi замянiлi бег на абцасах бегам у спартыўным абутку. Але дзяўчат, якiя цвёрда вырашылi паўдзельнiчаць у шоу, гэта не спынiла — пры рэгiстрацыi яны пакiдалi распiскi, што ў якасцi спартыўнага абутку выбiраюць... туфлi цi басаножкi на высокiх абцасах. I хоць некаторыя ўдзельнiцы падчас забегаў упалi, падрапаўшы локцi i каленi, прэтэнзiй да арганiзатараў яны не прад’яўлялi. А зацiкаўленыя вiдовiшчам гледачы i групы падтрымкi — тым больш.

Пераможцай у незвычайных спаборнiцтвах "Красунi на старце" стала студэнтка Гомельскага дзяржаўнага ўнiверсiтэта iмя Ф. Скарыны Iрына Савосцiна, якая атрымала ў якасцi прыза мабiльны тэлефон. Дарэчы, вучыцца дзяўчына якраз на факультэце фiзiчнага выхавання, так што да бегу — у любым абутку — ёй не прывыкаць.

Iншыя ўдзельнiцы таксама не засталiся без узнагарод — за прыгожыя ногi, за стыльныя туфлi, за волю да перамогi i г.д.