“Нячэсным” журналістам вяртаюць тэхніку

Источник материала:

14 октября 2008 Общество
Любоў Лунёва, Радыё Свабода Сьледчыя ў рэгіёнах і ў Менску вяртаюць журналістам кампутары, відэакамэры і дыктафоны, якія забралі паўгода таму, 27 сакавіка.

Нагадаем: у той дзень у журналістаў, а таксама ў офісах “Радыё Рацыя”, “Эўрапейскага радыё для Беларусі”, тэлекампаніі “БелСат” і ў гарадзенскіх офісах партыі БНФ і “Бацькаўшчына” супрацоўнікі КДБ забралі каля двух дзясяткаў кампутараў і ўсе носьбіты інфармацыі. Журналістам патлумачылі, што тэхніку забіраюць на праверку.

Тагачасны намесьнік менскага пракурора Аляксей Стук казаў, што тэхніку забралі на праверку ў рамках крымінальнай справы паводле факту распаўсюджваньня мультфільмаў палітычнага зьместу, якія абражаюць Аляксандра Лукашэнку і ягонае атачэньне.

Паводле сьледчых, журналісты маглі мець датычнасьць да распаўсюджваньня мультфільмаў. Нагадаем: у жніўні 2005 году супрацоўнікі КДБ зрабілі ператрус на кватэрах актывістаў ініцыятывы “Трэці шлях” Паўла Марозава, Андрэя Абозава і Алега Мініча. Сьледчыя забралі ў іх каля двух дзясяткаў кампутараў і ўсе носьбіты інфармацыі. Усе трое падазраваных у абразе Аляксандра Лукашэнкі знаходзяцца цяпер за мяжой.

Напрыканцы жніўня частку кампутараў, адабраных у журналістаў, вярнулі.

У пракуратуры паведамілі, што тэхніка, якая належыць Абозаву, Мінічу і Марозаву, застанецца ў сьледчых, пакуль ня будзе прынятае рашэньне — пакінуць яе ў якасьці рэчавых доказаў, вярнуць уладальнікам ці аформіць належным чынам і пакінуць да суду.

Намесьнік кіраўніка сьледчага аддзелу менскай пракуратуры Віктар Фешчанка паведаміў “Свабодзе”, што аргтэхніку павінны раздаць усім журналістам, у каго яе пазабіралі. Ён казаў, што гэтае рашэньне было прынятае яшчэ ў жніўні. Папросту ня ўсе сьледчыя добрасумленна выканалі распараджэньне.

“Тыя кампутары ўжо даўно раздавалі. Папросту хто раней, хто пазьней… Таму што каманда была вярнуць яшчэ раней… Даўно ўжо… Нават адна жанчына ў Горадні зьвярталася, і сьледчых прымушалі вярнуць кампутар. Чаго вы трымаеце?.. Ня нашы сьледчыя, не пракуратуры, а тыя, якія забіралі”.

Карэспандэнт “Радыё Рацыя” Віталь Рачкоўскі апавёў “Свабодзе”:

“Аддалі чатыры кампутары, тэлефонны гібрыд, два нашыя дыктафоны, якія забралі падчас ператрусу. Раней нам нічога не аддавалі. Нам усё вярнулі сьледчыя менскага КДБ”.

Супрацоўніца радыё 27 сакавіка была ў офісе са сваім уласным ноўтбукам. Яна казала пра гэта сьледчым:

“Кадэбісты, нягледзячы на мае заявы аб тым, што гэта мая асабістая тэхніка, канфіскавалі яго для нібыта нейкай праверкі. Калі аддавалі, я запытала, ці будуць праводзіць яшчэ нешта пасьля ператрусу. Яны мне адказалі, што на гэтым мае пакуты скончыліся. На пытаньне, навошта яны забралі мой асабісты ноўтбук з усёй рэдакцыйнай тэхнікай, яны заявілі, што ня ведалі, што гэта мой асабісты ноўтбук, бо гэта была толькі мая заява”.

Паводле пракуратуры, журналісты маюць атрымаць сваю маёмасьць да канца тыдня.