З білетамi на БАТЭ зноў праблемы

Источник материала:

Учора ў касах стадыёна "Дынама" i касах гарадскога стадыёна Барысава пачаўся продаж бiлетаў на матч БАТЭ-"Зенiт", якi пройдзе 5 лiстапада на стадыёне "Дынама". Раней паведамлялася, што бiлеты паступяць у касы ў 11 гадзiн ранiцы, аднак балельшчыкi, якiя сабралiся на сталiчнай вулiцы Кiрава (некаторыя, паводле прызнання, займалi чаргу ледзь не з 5 гадзiн ранiцы), былi моцна незадаволены, бо продаж квiткоў у названы час не пачынаўся. Мiлiцыя супакойвала натоўп фанатаў барысаўскага клуба, у адной з кас было выдаўлена шкло. Бiлеты ў касах сталiчнага "Дынама" пачалi прадавацца толькi а палове трэцяй гадзiны дня.

Як паведамiў дырэктар "Дынама-спорт" Уладзiмiр Лячынскi, колькасць бiлетаў, якая, паводле рашэння федэрацыi футбола, паступiла ў сталiчныя касы, невялiкая — усяго 6,5 тысячы. Улiчваючы факты спекуляцыi бiлетамi на матч "БАТЭ—"Ювентус", прынята рашэнне прадаваць не больш за 4 бiлеты ў адны рукi. Чарга ў дынамаўскiя касы даходзiла да будынка Мiнiстэрства спорту i складала паўтары тысячы чалавек. Паводле паведамлення прэс-службы бырасаўскага БАТЭ, у Барысаве продаж бiлетаў пачаўся ў 11 гадзiн ранiцы. Норма ў адны рукi такая ж — 4 бiлеты. Іх кошт — 10, 30 i 50 тысяч рублёў.