Мерныя злiткi атрымалi стыпендыяты Прэзiдэнцкага спартыўнага клуба

Источник материала:

17 снежня адбылося ўрачыстае ўшаноўванне стыпендыятаў Прэзiдэнцкага спартыўнага клуба, якiя паказалi высокiя вынiкi на ХХІХ Алiмпiйскiх гульнях i ХIII Паралiмпiядзе ў Пекiне, а таксама ўручэнне iмянных пасведчанняў стыпендыятам клуба на наступны год. Дыпломы, пасведчаннi i падарункi спартсменам уручыў старшыня цэнтральнага савета рэспублiканскага дзяржаўна-грамадскага аб’яднання "Прэзiдэнцкi спартыўны клуб" Дзмiтрый Лукашэнка. Ён падзякаваў спартсменам "за блiскучыя спартыўныя вынiкi", паказаныя на спаборнiцтвах чатырохгоддзя. 125 спартсменаў i спартсменаў-паралiмпiйцаў, а таксама 10 трэнераў будуць атрымлiваць стыпендыi налета, паведамiў кiраўнiк Прэзiдэнцкага клуба. "Дзякуючы вашым адметным выступленням, павялiчылася не толькi колькасць стыпендыятаў, але i памер стыпендый. Ванкувер-2010 i Лондан-2012 вашы арыенцiры ў нашай сумеснай працы", — адзначыў Дзмiтрый Лукашэнка.

Падзяку Прэзiдэнцкага спартыўнага клуба, а разам з ёй i 10-грамовыя мерныя плацiнавыя злiткi атрымалi 25 спартсменаў. Сярод iх Наталля Ануфрыенка (баскетбол), Аляксандр Буйкевiч i Валерый Прыёмка (фехтаванне), Аляксей Iгнатовiч i Настасся Марачкоўская (спартыўная гiмнастыка), Алена Фiлiпава (барацьба вольная), Iрына Кулеша, Сяргей Лагун, Генадзь Махвiеня, Настасся Наваковiч (цяжкая атлетыка), Вiктар Вабiшчэвiч (плаванне). Памочнiк Прэзiдэнта па пытаннях фiзiчнай культуры i спорту Генадзь Аляксеенка адзначыў, што дзякуючы падтрымцы Прэзiдэнцкага клуба, стыпендыяты "змаглi падрыхтавацца i ўзяць удзел у Алiмпiйскiх гульнях, дзе паказалi дастойныя вынiкi", i выказаў спадзяванне, што "такiя мерапрыемствы будуць стымулам для ўдасканальвання свайго майстэрства" i надалей. Стыпендыяты, якiя паднялiся на п’едэстал мiжнародных спаборнiцтваў сёлета, а гэта гiмнастка Анастасiя Iванькова (групавое практыкаванне) i Уладзiмiр Iзотаў (плаванне) атрымалi 100-грамовыя плацiнавыя злiткi. Сярэбраны прызёр Алiмпiяды ў Пекiне ў дзесяцiбор’i Андрэй Краўчанка падзяку атрымлiваў з фармулiроўкай "За волю да перамогi i спартыўны характар". А да яе — 200-грамовы плацiнавы злiтак. Чэмпiён i прызёр Паралiмпiяды ў плаваннi Раман Макараў узнагароджаны 300-грамовым злiткам, а самы важкi, 500-грамовы дастаўся таксама чэмпiёнцы i прызёрцы Паралiмпiяды ў веласпорце Алене Драздовай. Як пасля прызнаўся ў iнтэрв’ю капiтан беларускай зборнай на Паралiмпiядзе ў Пекiне Раман Макараў, для яго самае важнае — увага, якую праяўляюць да спартсменаў, i ў тым лiку да паралiмпiйцаў. "Прэзiдэнцкi спартыўны клуб заўсёды з разуменнем ставiўся да iнваспорту. I тое, што з гэтага года стыпендыi алiмпiйцаў i паралiмпiйцаў зраўнялi, гаворыць пра тое, што сацыяльная палiтыка нашай дзяржавы развiваецца гэтак жа, як у самых заможных краiнах свету. У сучасным спорце дасягненне высокiх вынiкаў немагчыма без адпаведнага фiнансавання, таму ўдвая прыемна, што Прэзiдэнцкi спартыўны клуб аказвае i матэрыяльную падтрымку ў выглядзе стыпендый i каштоўных падарункаў".

Мiнiстр спорту i турызму Аляксандр Грыгараў адзначыў, што "магутная дзяржава — гэта перадавая навука i эканомiка, здаровая нацыя i высокiя вынiкi спартсменаў." Мiнiстр нагадаў, што ў Пекiне 28 беларусаў узнiмалiся на п’едэстал гонару, сярод iх 11 зусiм маладых спартсменаў ва ўзросце ад 18 да 21 года. "Андрэй Арамнаў, Андрэй Багдановiч i Артур Лiтвiнчук — вось касцяк нашай будучай алiмпiйскай зборнай." Аляксандр Грыгараў адзначыў вялiкую ролю Прэзiдэнта краiны ў развiццi спорту i ўручыў старшынi Прэзiдэнцкага клуба Дзмiтрыю Лукашэнку ад iмя беларускай мiсii на Алiмпiядзе ў Пекiне памятны медаль.