Хачу купiць трактар у прыватнiка. Як правiльна аформiць здзелку?

Источник материала:

Наколькi можна зразумець з кантэксту лiста чытача, гаворка iдзе пра магчымую здзелку памiж фiзiчнымi асобамi. Тады цалкам зразумелы зварот заяўнiка ў рэдакцыю: параўнальна нядаўна ў парадак куплi-продажу колавых трактароў i самаходных машын менавiта для грамадзян-прыватнiкаў былi ўнесены пэўныя змяненнi. Верагодна, не ўсе грамадзяне пра гэта маюць дакладную падрабязную iнфармацыю. Калi коратка: працэдура куплi-продажу вышэйназванай тэхнiкi была значна спрошчана.

— Уладальнiкаў колавых трактароў i iншых самаходных машын ураўнавалi ў правах з уладальнiкамi аўтатранспарту. Скажам, куплю-продаж аўтамабiля грамадзянiн афармляў у ДАI бясплатна. А вось уладальнiк трактара праходзiў больш складаны шлях, — патлумачыў галоўны iнжынер-дзяржiнспектар галоўнай дзяржаўнай iнспекцыi па наглядзе за тэхнiчным станам машын i абсталявання Мiнсельгасхарча Пётр Вольскi. — Прадаць раней той жа трактар можна было праз камiсiйную краму, альбо засведчыць здзелку куплi-продажу ў натарыуса. Пры гэтым грамадзянiн павiнен быў заплацiць за паслугi камiсiйнай краме 70—75 тысяч рублёў, а пры звароце да натарыуса — аплацiць дзяржпошлiну ў памеры 175 тысяч рублёў (5 базавых велiчынь). Безумоўна, i зараз нiхто не перашкаджае грамадзянам звяртацца да паслугаў камiсiйнага гандлю (дарэчы, не ў кожным раёне ёсць такiя крамы), аднак цяпер ёсць i больш простыя шляхi. З гэтай мэтай былi ўнесены змяненнi i дапаўненнi ва Указ Прэзiдэнта Рэспублiкi Беларусь № 504 ад 15 кастрычнiка 2007 года i ў пастанову Савета Мiнiстраў Рэспублiкi Беларусь №1459 ад 5 лiстапада 2007 года. Гэтымi дакументамi вызначана, што дагавор куплi-продажу таго ж трактара цяпер рэгiструецца толькi ў iнспекцыях Дзяржнагляду.

Як патлумачыў далей Пётр Уладзiмiравiч, адказваючы на пытанне нашага чытача, месца рэгiстрацыi дагавора куплi-продажу трактара найперш залежыць ад таго, зняў цi не зняў з улiку ў iнспекцыi Дзяржнагляду гэтую тэхнiку яе прадавец. Калi трактар не зняты з улiку, для афармлення дагавора куплi-продажу неабходна звяртацца ў iнспекцыю Дзяржтэхнагляду па месцы рэгiстрацыi тэхнiкi. Працэдура гэта зараз бясплатная — як i пры рэгiстрацыi аўтамабiля. Усю неабходную iнфармацыю можна будзе атрымаць непасрэдна ў дзяржiнспектараў.

Калi ж колiшнi гаспадар трактара ўжо зняў тэхнiку з рэгiстрацыi, дык дагавор куплi-продажу можна будзе аформiць як па месцы знаходжання пакупнiка, так i ўвогуле ў любой iншай iнспекцыi Дзяржтэхнагляду. Усе яны, як правiла, знаходзяцца ў складзе ўпраўленняў сельскай гаспадаркi i харчавання райвыканкамаў (ёсць 8 гарадскiх iнспекцый).