Напачатку, арандатар, ствары ўмовы!

Источник материала:

Арандатарам рыбалоўных угоддзяў, якiя прызначаны для арганiзацыi платнай аматарскай лоўлi, плануюць забаранiць браць плату з рыбакоў, пакуль не будзе ўладкавана берагавая лiнiя. Маецца на ўвазе будаўнiцтва кладак, прыпынкаў транспарту, устаноўка кантэйнераў для смецця, прыбiральняў i iнш. Прынамсi, такую думку агучыў начальнiк Дзяржаўнай iнспекцыi аховы жывёльнага i раслiннага свету пры Прэзiдэнце Рэспублiкi Беларусь Мiхаiл Арэшка.

Паводле яго слоў, многiя рыбаловы-аматары скардзiлiся на тое, што арандатары ўгоддзяў немаведама за што бяруць з iх грошы. Таму сiтуацыя была разгледжана сумесна з Мiнiстэрствам сельскай гаспадаркi i харчавання, вынiкам чаго стала прапанова аб унясеннi змяненняў у правiлы, якая зараз узгадняецца. Зноў жа, абапiраючыся на прапановы аматараў, вырашана зрабiць правiлы для арандатараў больш жорсткiмi: па ўлiку ўлову, абазначэннi месца лоўлi рыбы.

Паводле слоў начальнiка Дзяржiнспекцыi, зараз актыўна абмяркоўваецца ўнясенне змяненняў у правiлы рыбалоўства. Напрыклад, прапрацоўваецца пытанне, каб аматарскiя прылады рыбалоўства на вадаёмах не былi безгаспадарчымi. Паводле вопыту некаторых iншых краiн, у прыватнасцi, прапануецца на стаўных прыладах пазначаць адрас рыбалова. Ёсць прапанова i па абмежаваннi колькасцi прыладаў лоўлi. Яшчэ адна з iх датычыць магчымага вызначэння шырынi берагавой лiнii, якую можа заняць рыбалоў. У краiнах Балтыi, скажам, рыбаловы абмежаваныя 10 метрамi. Не выключана таксама, што аматараў рыбалкi абавяжуць сачыць за санiтарным станам берагавой лiнii.

Як было агучана, патрабуе вырашэння i праблема, звязаная з падводнай лоўляй рыбы. Згодна з правiламi, на некаторых вадаёмах дазволена так званая iнтэнсiўная лоўля — на большую колькасць кручкоў, чым звычайна, тролiнг i падводнае паляванне. Дык вось "звычайныя" рыбаловы лiчаць, да прыкладу, што iх калегi-"падводнiкi" фактычна "выбiваюць" матачны статак: адстрэльваюць буйную рыбу, якая падаўжае "рыбiн род".