Памерла настаўніца з Копыльскага раёну, дзе выявілі каранавірус

Пра смерць Наталлі А. Радыё Свабода расказаў яе сусед Мікалай, былы настаўнік Доктаравіцкай школы.

«Памерла Наталля, памерла сёння ўначы, — паведаміў у размове са Свабодай Мікалай. — Я быў раніцай у краме, там людзі расказалі пра гэта. У Доктаравічах ужо ведаюць».

Па словах Мікалая, апошнія пяць дзён Наталля была ў рэанімацыі, лекары змагаліся за яе здароўе. Мэдыкі казалі аднавяскоўцам, што ў яе нібыта быў каранавірус.

У Капыльскай лякарні не адказваюць на тэлефанаванні журналістаў.

У Новыя Доктаравічы Наталля А. пераехала разам з мужам з Мінску каля 4 гадоў таму. У мясцовай школе яна выкладала англіску мову. Муж доўгі час быў вайскоўцам, цяпер на пенсіі. Яго разам з дачкой шпіталізавалі 30 сакавіка.

У той жа дзень мэдыкі «забралі» з вёскі каля 20 дарослых і столькі ж дзяцей. Паводле інфармацыі Свабоды, атрыманай ад бацькоў вучняў Доктаравіцкай школы, у некаторых з дзяцей аналіз на каранавірус даў станоўчы вынік.

Нагадаем, што раніцай 1 красавіка жыхарка Віцебска расказала, што яе мама памёрла ад каранавіруса, а 31 сакавіка ў Белерусі памёр віцебскі актор – першая афіцыйна прызнаная ахвяра COVID-19. 

Усе навіны на тэму Каранавірусу чытайце тут.