Расціславу Янкоўскаму — 80

Источник материала:

5 лютага (пятніца) спаўняецца 80 гадоў народнаму артысту СССР Расціславу Янкоўскаму. У гэты дзень у Нацыянальным акадэмічным драматычным тэатры імя Максіма Горкага (Рускім тэатры) пройдзе юбілейная вечарына артыста.

Да юбілею падрыхтавана «Сунічная паляна Янкоўскага». На сцэну замест звыклых гледачу герояў спектакля выйдуць сваякі, сябры і калегі юбіляра з віншаваннямі.

Янкоўскі сыграў больш як 160 роляў у тэатры і кіно. Артыст удастоены ордэна Францыска Скарыны і ордэна Айчыны III ступені, з’яўляецца лаўрэатам прэміі «За духоўнае адраджэнне». З моманту заснавання Мінскага міжнародага кінафестывалю «Лістапад» ён выступае яго нязменным старшынёй. У Нацыянальным акадэмічным тэатры імя Горкага Янкоўскі працуе з 1957 года.

Апрача таго, з 6 па 11 лютага заслужаны артыст Беларусі Андрэй Душачкін запрашае гледачоў Рускага тэатра на »Душэўныя сустрэчы» ў гонар свайго 50‑годдзя. На працягу тыдня ў тэатры будуць паказаныя спектаклі з удзелам акцёра: «Я веру ў гараскопы», «Каштанка», «Свабодны шлюб», «Дзядзечкаў сон», «Перад заходам сонца». Завершацца «Душэўныя сустрэчы» спектаклем «Бег», у якім Душачкін выконвае галоўную ролю.

24 лютага ў тэатры пройдзе юбілейная вечарына, прымеркаваная да дня нараджэння народнай артысткі Беларусі і лаўрэата дзяржаўнай прэміі Беларусі Вольгі Клебановіч. Падчас вечарыны пройдзе 260‑ы паказ спектакля «Ад’ютант‑Ша Яго Вялікасці».