Ваўчыца пакусала на Мазыршчыне дзвюх жанчын (фота)

Дзве жыхаркі Мазырскага раёна пацярпелі ад нападу ваўчыцы, інфармуе Гомельскае абласное ўпраўленне МНС.

Першае паведамленне пра пацярпелую жанчыну паступіла ўвечары 19 жніўня. Да ратавальнікаў звярнулася фельчар хуткай меддапамогі і паведаміла, што ў вёсцы Акулінка ваўчыца напала на мясцовую жыхарку. На месцы выкліку ратавальнікі выявілі, што здарэнне адбылося каля 16-й гадзіны. Ваўчыца (як мяркуецца, шалёная) зайшла на адзін з падворкаў у вёсцы і ўкусіла 62-гадовую пенсіянерку. Пасля гэтага ваўчыца ўцякла ў бок лесу, а жанчына на сваім аўто прыехала ў мясцовую лякарню.

Праз паўтары гадзіны пасля гэтага здарэння ў той жа вёсцы ваўчыца напала на 64-гадовую пенсіянерку, якая сядзела на лавачцы. Жанчына паклікала на дапамогу, і яе крыкі пачуў мазырскі ратавальнік. які разам з бацькам прыехаў у вёску на сваё лецішча. Віламі і рыдлёўкамі мужчыны адагналі жывёлу і забілі.

Паведамляецца, што ваўчыца ўкусіла адну з пенсіянерак у правы локаць. Жанчына ад шпіталізацыі адмовілася.

Другую пацярпелую шпіталізавалі з дыягназам "укушаная рана правай кісці, адкрыты пералом другой запясцевай косткі".