У ААТ “ЖорнаўкаАГРА” ўбіраюць кукурузу на зялёны корм і сілас

Источник материала:

Час “царыцы палёў”

Пасля рэарганізацыі гаспадаркі агульны з лапіцкім кукурузны клін зараз складае 1040 гектараў, з якіх 300 прызначаецца на зерне. А размясцілася “царыца” амаль на трох дзясятках участкаў.

Для эфектыўнай арганізацыі работы створаны мехатрад. На адвозцы задзейнічаны 4 трактары, 2 МАЗы і кормараздатчык, на якім працуе Аляксандр Гулік. Зялёная маса дастаўляецца ім на корм жывёле на розныя фермы. Такі свежы пачастунак рагулі любяць. Ды і кукуруза сёлета дастаткова сакавітая.

На “палявой нарадзе” з Інай Абрамовіч механізатары Аляксандр Гулік і Міхаіл Тышкевіч.

 На кормаўборачных камбайнах КВК-800 працуюць механізатары Міхаіл Тышкевіч і Уладзімір Ласкавец. Задачы перад жорнаўскімі аграрыямі стаяць сур’ёзныя: за сезон закласці 11 тысяч тон сіласу. Патрабуецца запоўніць 6 сіласных ям, з якіх 3, дарэчы, нядаўна ўведзеныя ў строй. Адна траншэя, якая змясціла 2 тысячы тон здробненай кукурузнай масы, ужо гатова.

— Плануем справіцца з кукурузай на сілас на працягу бягучага месяца, — расказала галоўны аграном гаспадаркі Іна Абрамовіч. — Пакуль маем ураджайнасць каля 400 цэнтнераў з гектара, але, думаю, гэты паказчык з цягам часу будзе ўзрастаць. А ўвогуле зараз час актыўных работ. Пасеялі 450 гектараў азімага рапсу, 220 — сурэпкі, 270 — пшаніцы. Прыступілі і да ўборкі цукровых буракоў, выкапалі ўжо амаль тысячу тон. Так што кожны вераснёўскі дзень прыносіць палявыя здабыткі і стварае зачын ураджаю наступнага года.

Валянціна КОРБАЛЬ.

v.korbal@gzt-akray.by